Ilir Meta ka pezulluar betejën në Kuvend me Ramën për ligjin e plehrave pas takimit mister prej dy orësh që u zhvillua dje në zyrën e Kryeministrit.
Në faqen zyrtare të Kuvendit është publikuar axhenda e firmosur nga Meta, ku theksohet se dy dekretet e Presidentit të Republikës, për kthimin e ligjit të mbetjeve dhe ligjit të dhomave të tregtisë do të shqyrtohen në Komisionet Parlamentare.
Sipas të gjitha gjasave, ky dekret do të shqyrtohet në seancën e fundit për 2016-n, të enjten 29 Dhjetor.
Ndërkaq, kundërshtarët e Edi Ramës kishin përgatitur sulmin që prej një jave të bënin numrat në Kuvend për të rrëzuar ligjin, duke krijuar kështu një precedent për rënien e mazhorancës.
Disa grupe të shoqërisë civile të mbështetura nga opozita kanë organizuar që në orët e vona të ditës së sotme një protestë maratonë para Kuvendit. Por duket se gjithçka do të shtyhet.
Megjithatë një zhvillim i ri nga front ii LSI-së ka bërë përshtypje dhe është entuziazmi i Petrit Vasilit pas qëndrimit të prokurorisë për të hequr mandatin e deputetit të LSI për Vlorën Shkëlqim Selami, i cili është edhe kryetari i degës së partisë së Ilir Metës për qytetin bregdetar të jugut.
Prapa deklaratave për një qasje parimore, fshihet një përplasje e fortë e Ilir Metës me Shkëlqim Selamin, i cili prej verës ka lëvizur me Edi Ramën dhe nuk i është përgjigjur thirrjes së kreut të LSI-së për të rrëzuar Edi Ramën me mocion mosbesimi në Kuvend.
Ilir Metës i duhet shumë një zëvendësim i Shkëlqim Selamit me njerëzit e listës së LSI-së në qarkun Vlorë, çka do t’i jepte kreut të Kuvendit një frymëmarrje më të madhe.
Edi Rama, nga ana e tij, i bëri karshillëk Metës duke dalë në lungomare me Selamin, që u përkthye si bekim i aleancës së re.
Mirëpo Ilir Meta është hakmarrë gjithsesi, duke vendosur me urgjencë në rendin e ditës një interpelancë të Edi Ramës me disa nga deputetët më cilësorë të Kuvendit. E ata janë: Astrit Patozi, Ben Blushi, Mimoza Hafizi, Dashamir Shehi, Vangel Dule, Agron Duka dhe natyrisht Nard Ndoka.
Shkurt, Edi Rama do të jetë nesër në një duel “hekurash” jo me zhurmëmëdhenjtë e PD-së, por me oratorët më të spikatur që janë Astrit Patozi e Ben Blushi, por edhe dy deputetët babaxhanë Shehi e Duka. Interpelanca zhvillohet për çështjen e negociatave në BE.
Dhe të gjithë deputetët e mësipërm kanë cilësuar Ben Blushin si njeriu që do të debatojë me kryeministrin.
Pra për herë të parë nesër do të kemi një duel të nivelit të lartë mes Edi Ramës dhe Ben Blushit, që sipas të gjitha gjasave do të jetë cilësor edhe pse nervoz. Në këtë duel, ku Meta e ka nxjerrë Ramën në “grykën e zjarrit” pa u përgatitur pritet që gjithçka të zgjidhet nga një detaj i vogël nervoziteti apo aftësie në fjalim.
Edi Rama është i aftë në publiçistikë por flet gjatë zakonisht dhe mund të krijojë hapësira për breshërinë e sulmit të hidhur të Ben Blushit, i cili gjithashtu është i njohur për pamfletizmin me spec.
Shkurt do të ketë një spektakël të nivelit të lartë.
Por në këtë rast, Ilir Meta, mund të jetë fitues nëse Rama rrëzohet nga Blushi, por që nuk i kushton asgjë nëse kryeministri del fitues në debat.
Meta ka luajtur pa top, dhe Rama ka pranuar që më mirë të përballet “në zjarr” me Ben Blushin sesa me prapaskenat e një votimi për mbetjet që mund ta rrëshqasë keqas. Madje pa u dhënë vendimi për vettingun…/tesheshi.com/
