Ilir Meta me dy akademikë, mision negocimi për krizën politike në Kosovë

Pas misionit paraprak të ish-Kryeministrit Pandeli Majko, për të hapur një proces pajtimi mes mazhorancës dhe opozitës në Kosovë, mësohet se një tentativë tjetër do të kryesohet nga kreu i Kuvendit të Shqipërisë, Ilir Meta.

Kreu i Kuvendit do të shoqërohet nga dy akademikë të njohur, emrat e të cilëve ende nuk janë mësuar.

Misioni i Metës merr shkas edhe nga fakti se ai ka marrëdhënie të ngushta me dy nga liderët e opozitës: përkatësisht kryetarin e AAK-së, Ramush Haradinaj dhe kreun e Nisma-s, Fatmir Limaj.

Kryeparlamentari Meta dhe shoqëruesit e tij do të takohen me zyrtarë të PDK-së, të AAK-së, të Vetëvendosje!-s dhe të Nismës për Kosovën.

Ilir Meta dhe shoqëruesit e tij do të bisedojnë me dy personalitete që kanë fuqi vendimmarrëse në Partinë Demokratike të Kosovës, kryetarin Hashim Thaçi dhe zëvendëskryetarin Kadri Veseli.

Po ashtu, treshja ndërmjetësuese do të takohet edhe me drejtuesit e tri partive opozitare, liderin e Lëvizjes Vetëvendosje!, Visar Ymerin, atë të Aleancës për Ardhmërinë e Kosovës (AAK), Ramush Haradinajn, si dhe me kryetarin e Nismës për Kosovën, Fatmir Limajn.

Kriza politike në vendin tonë ka nisur në fillim të sesionit vjeshtor të punës së Kuvendit të Kosovës. Në seancën plenare të Kuvendit, më 23 shtator, disa nga deputetët opozitarë, të pakënaqur me marrëveshjet e fundit me Serbinë dhe me Malin e Zi, e kanë gjuajtur me vezë kryeministrin Isa Mustafa, duke ia pamundësuar kështu raportimin e tij para deputetëve për marrëveshjen për Asociacionin e komunave me shumicë serbe si dhe marrëveshjen për Demarkacionin me Malin e Zi. Opozita më pas ka vazhduar të mos e lejojë mbajtjen e seancave të rregullta të Kuvendit, fillimisht me hedhjen e ujit e, më pas, edhe të gazit lotsjellës. Në shenjë pakënaqësie me marrëveshjet, opozita i ka braktisur edhe komisionet parlamentare, për të vazhduar me protesta të ndryshme në sheshet e kryeqytetit. Pas bllokimit të punës së Kuvendit, presidentja e Kosovës, Atifete Jahjaga, ka iniciuar takimet me liderët e partive parlamentare, në përpjekje për ta gjetur një zgjidhje, por opozitarët s’i janë përgjigjur ftesës së saj për një takim të përbashkët me liderët e dy partive në pushtet.

/tesheshi.com/