Kampi i Jalës është një eveniment politik unik në Shqipëri, dhe siç tha një deputet gjerman, përkatësisht Friedbert Pflüger, ai është unik dhe në Europë.
Të rinj nga i gjithë vendi shijojnë 2 javë pushime me të fjetur, të ngrënë, të pirë dhe madje dhe zhezlonget e paguara, në plazhin e Jalës në Rivierën e Bregut.
Të rinjtë ndryshohen me rotacion, duke rritur kështu numrin e pushuesve që gjatë aktiviteteve të darkës brohorasin për Ilir Metën dhe politikanët që kreu i LSI-së sjell për t’u treguar këtë eveniment unik.
Herëpashere, Meta sjell edhe figura të njohura të së majtës, të cilët nuk i kursejnë komplimentet për kreun e LSI-së.
Vitin e kaluar spikati Arta Dade, prezenca e së cilës u mor si një sinjal pas acarimit të marrëdhënieve me Edi Ramën.
Kurse sivjet, Meta ka “regjistruar” në Summer Camp Jalë, dy nga “senatorët” socialistë më të irrituar me Edi Ramën: përkatësisht ish-presidentin Rexhep Meidani, për të cilin u fol se do të jetë kryeministër i një qeverie teknike, por edhe deputetin Namik Dokle.
Rexhep Meidani në mënyrë periodike i shfaq kundërshtitë e ashpra ndaj qeverisë së PS-së.
Kurse Dokle, ka përdorur shpesh të folurën e drunjtë dhe indirekte për të kritikuar.
Ndërsa në vijën e parë të sulmit ndaj Edi Ramës dhe ministrave të tij, është aktive në rrjetet sociale, e bija e deputetit socialist, mjekja Anika Dokle, e cila gjithsesi ka bërë të ditur se qëndrimin e saj sovran, e shikon si një shprehje mendimi dhe jo parathënie angazhimi politik.
Megjithatë pjesëmarrja në kampin e Jalës e disa nga figurave kryesore të PS-së, që vjen pas drekës politike të Ilir Metës me Koço Kokëdhimën dhe Rexhep Meidanin, duket se është shenjë që kreu i LSI-së do të luajë fort në kuadrin e një beteje të ashpër me mikun-armik, Edi Rama.
Siç duket, një pjesë e figurave të PS-së do të kandidojnë për LSI-në.
Namik Dokle, në fjalën e tij drejtuar të rinjve të LRI-së, ka evokuar emrin e deputetes-studente të LSI-së, Klejdi Mehmetaj, duke thënë se ai dhe Klejdi arrijnë të mbledhin vota për t’u zgjedhur. Por pjesa ku Dokle jep një qëndrim 100% të njëjtë me Ilir Metën është ajo për reformat, ku duket se ka një qëndrim në distancë nga partia, deputet i së cilës ai është.
“Një nga elementët bazë përsa i përket reformave, për të bërë reforma të mëdha dhe të qëndrueshme, është më e mira që të gjendet zgjidhja, konsensusi me opozitën. Nga kjo pikëpamje unë mendoj se konsensusi duhet synuar. Parulla demokratike është që të arrish konsensusin e plotë me opozitën është e pamundur, por drejt saj duhet synuar gjithmonë”, tha Dokle.
Ky përafrim qëndrimesh të çon në drejtimin edhe të lëvizjeve të afërta politike, që dDokle duket se i ka të afruara me LSI-në. /tesheshi.com/
