Në prag të vendimit për aleancës zgjedhore për 2017-n Ilir Meta ka dhënë një sinjal të fortë që nuk mund të shmanget pa u marrë si politik.
Kreu i LSI-së ka ndëshkuar dhe lënë jashtë udhëheqjes së re të partisë së re të gjithë ministrat e kabinetit “Rama”, që nga shtatori i vitit 2013 kur nisi qeverisja e mazhorancës së qendrës së majtë.
Kështu mbrëmë Meta ka rinovuar kupolën e ngushtë drejtuese duke mos caktuar në post të lartë as ish-ministrin e Drejtësisë, Nasip Naço, as ish-ministrin e Transporteve, Edmond Haxhinasto, as ministrin e Drejtësisë, Ylli Manjani, as ministrin e Bujqësisë, Edmond Panariti, as ministren e Integrimit, Klajda Gjosha, e as ministrin e Mjedisit Lefter Koka.
Meta ka caktuar si zëvendës të parë të tij zyrtar, Petrit Vasilim që ka qenë dhe mbetet mëkëmbësi i tij në LSI.
Ka spostuar Luan Ramën nga posti i Sekretarit të Përgjithshëm në atë të nënkryetarit.
Ndërkohë, kreu i LSI-së ka vendosur si sekretar të Përgjithshëm Endrit Brahimllarin, ish-kreun e LRI-së, i cili ka një ngjashmëri gati organike me kryetarin themelues të partisë së tij-Ilir Meta.
Kurse deputeten “çupëlinë” Klejdi Mehmetaj, e ka vendosur nënkryetare.
Në kohën kur Ministri i Transporteve, Edmond Haxhinasto, u largua nga detyra, kreu i grupit parlamentar të LSI, Petrit Vasili, tha se ai do të angazhohej në programin politik e elektoral të LSI.
“LSI së shpejti ka konventën zgjedhore ku do të ketë rishikim të programit” tha zoti Vasili. Me sa duket, ish – drejtuesi i një prej ministrive kryesore të Qeverisë Rama nuk do të jetë pjesë e strukturave drejtuese të LSI. Përzgjedhja e bërë deri më tani publike nga LSI për strukturat drejtuese tregon se pas largimit nga qeveria, të njëjtin “fat” e pret edhe nga partia.
Ndërkaq, Meta ka larguar nga posti i numrin dy edhe Shezai Rrokajn, i cili është dhe kryetar i degës së Tiranës.
Meta ka ftuar çdo anëtar të Komitetit Drejtues Kombëtar dhe deputetë, të cilët dëshirojnë të kandidojnë në këto poste, të paraqesin kërkesë me shkrim deri sot pranë Sekretarit të Përgjithshëm, Luan Rama.
Por duhet thënë se propozimi i parë i kryetarit ka precedencë në votim dhe normalisht do të ndikojë në votën e nesërme të konventës./tesheshi.com/
