Ilir Meta mësohet se këto dië ka thirrur në një darkë të gjithë grupin parlamentar të LSI-së në mënyrë që të bëjë një bilanc të mundshëm nëse ndodh skenari i ndryshimit të qeverisë.
Ndërkohë që pritet të kërkojë përfundimisht dhe në mënyrë ultimative largimin e Ministrit të Brendshëm, Saimir Tahiri për ta marrë vetë këtë dikaster, i kanë ardhur fjalë se Edi Rama ka siguruar 71 votat në Kuvend për të mbijetuar pa të.
Aq stresuese është bërë kjo situatë, sa për çdo deputet këto ditë po bëhet një betejë e madhe.
Siç mësohetm në testin politik të bërë nga kreu i LSI-së në zijafetin e organizuar me sebepin e mbledhjes për qejf, kanë munguar dy deputetë të rëndësishëm të kësaj force politike: njëri nga një qark skajor në jug dhe tjetri nga veriu.
Kjo ka ndodhur në një kohë ku është tentuar që Ben Blushi dhe Mimoza Hafizi të joshen për të votuar kundër qeverisë.
Por deputeti socialist që pritet të krijojë parti të re ka refuzuar kategorikisht.
Kjo ka çuar në shpërthimin e një sulmi frontal nga njeriu i Metës në media, Artur Zheji.
Analisti, në portalin e tij 360gradë.al ka sulmuar aq ashpër Blushin sa theksonte se “ka marrë zarfe me propozime konkrete nga Edi Rama”.
Ky sulm i Zhejit ka sjellë kundëreagimin e Blushit nëpërmjet portalit të miqve të tij, Bushati e Shkullaku, lapsi.al.
Ata bënin të ditur se Blushi nuk pranon shantazh politik, e se do të vazhdojë në mënyrë parimore sulmin ndaj Edi Ramës.
Vetë kryeministri gjatë pushimeve në Dhërmi ka pasur takime me disa deputetë që nuk janë në asnjë grup parlamentar, por edhe me ata brenda PS-së, për të kolauduar “valvulën e sigurisë”.
Në fakt PS e vetme ka 63 deputetë, me 5 të PDIU-së bën 68. Për të qeverisur i duhen vetëm tre deputetë. Dhe ata janë në Kuvend: Tom Doshi, Mirela Ferracaku dhe Nard Ndoka.
I ashtuquajturi grupi kristian-demokrat pritet të faktorizohet sërish në politikë, si në 2006 kur Nard Ndoka u bë ministër Shëndetësie. /tesheshi.com/
