E përditshmja italiane Il Giornale ka marrë kritika të ashpra për dhurimin e manifestit të Hitlerit. Mein Kampf-i u është dhuruar blerësve që kanë paguar për një suplement të gazetës këtë të shtunë.
Një gazetë e familjes së Berlusconi-t, Il Giornale nisi dje shitjen e një historie tetëvëllimëshe të Rajhut të Tretë, dhe shitja e vëllimit të parë u shoqërua me një dhënie falas të një kopje me komente të Mein Kampf-it.
Kryeministri italian e quajti “të ndyrë” vendimin e gazetës për të shpërndarë falas traktatin politik të liderit nazist.
Një “akt i ulët” u quajt veprimi nga Renzo Gattegna, kryetari i Unionit të Bashkësive Hebreje Italiane.
Ndërkohë, kryeredaktori i gazetës, Alessandro Sallusti, do të thoshte se shpërndarja falas e Mein Kampf-it nuk mund të interpretohej si një apologji për nazizmin. Përndryshe, ajo çka bëri gazeta, sipas tij, mund të shihet si një mundësi për ta studiuar të keqen dhe për ta shmangur kthimin e saj.
“Shqetësimet e miqve tanë të bashkësisë hebreje italiane, që gjithmonë na kanë parë dhe do të na shohin në anën e tyre, meritojnë të gjithë respektin tonë,” shkruajti ai në një editorial. /tesheshi.com/
