Gjashtë ditë pasi Ukraina u pikëllua nga lajmi për vdekjen e Polinës së vogël, sot kryeqyteti ukrainas u trondit nga lajmi për vdekjen e vëllait të saj pesëvjeçar.
Semyon i vogël po luftonte për jetën në spital pasi makina e familjes së tij u godit me armë zjarri teksa ata po përpiqeshin të arratiseshin nga kryeqyteti i Ukrainës të shtunën. Ata dyshohet se u qëlluan nga diversantët rusë në Kiev.
Prindërit Anton Kudrin dhe Svetlana Zapadinskaya, të dy veterinere, vdiqën në të njëjtën ditë së bashku me vajzën e tyre të mesme Polina.
Semyon ndërroi jetë në Spitalin e Fëmijëve Ohmatdit të mërkurën, tha një mik i familjes për Telegrafin.
Besohet se motra e madhe e Polinës dhe Semyonit, Sofia, 13 vjeçe, është ende në terapi intensive në një spital tjetër.
Fotoja e Polinës, një fanse e Harry Potter me flokë rozë, u shpërnda fillimisht në rrjetet sociale nga nënkryetari i bashkisë Volodymyr Bondarenko.
Ajo ishte fëmija i parë viktimë e konfliktit.
“Emri i saj ishte Polina. Ajo ndiqte klasën e 4-të të një shkolle në Kiev,” tha Bondarenko.
Më herët këtë javë, presidenti ukrainas Volodymyr Zelensky tha se 16 fëmijë ishin vrarë, megjithëse ky numër ka të ngjarë të jetë më i lartë. Mes tyre ishte edhe një 16-vjeçar i quajtur Ilija, i cili u vra teksa luante futboll pranë një shkolle në Mariupol.
Një tjetër ishte një vajzë 6-vjeçare pa emër nga i njëjti qytet, e cila u vra pasi ushtarët rusë bombarduan bllokun e saj të apartamenteve të dielën.
Teksa u përpoq ta shpëtonte, doktori iu drejtua një fotografi të Associated Press dhe i zemëruar tha: “Tregoji Putinit këtë: sytë e këtij fëmije dhe doktorit që qante”.
Një tjetër djalë u vra kur një bllok banesash u godit nga bomba në Chuhuiv në lindje të vendit. /tesheshi.com/
