Iku nga Barcelona gjatë kësaj vere duke u transferuar te PSG, me një objektiv të qartë, pikërisht për të mos qëndruar më në hijen e Lionel Messit dhe për t´u shndërruar në futbollistin më të mirë në Botë.
Në këto 9 vite Topi i Artë ka qenë pronë e argjentinasit të Barcës dhe Cristiano Ronaldos, por Neymar me kalimin te Paris Saint Germain i ka të gjitha mundësitë për ta fituar këtë trofe të rëndësishëm individual, pasi tashmë braziliani mban edhe petkun e futbollistit më të shtrenjtë të historisë futbollit, pasi blerja e tij nga Barca i kushtoi arkave të Parisit plot 222 milionë Euro.
Fitimi i Topit të Artë është ëndrra e çdo futbollisti por edhe pse e dëshiron ta bëjë të tijin këtë trofe prestigjoz, Neymar nuk është i fiksuar pas Topit të Artë, pasi për momentin ka objektiva të tjerë.
“Është e vërtetë dhe nuk kam pse e fsheh dicka të tillë. Çdo futbollist dëshiron të fitojë Topin e Artë. Është çmimi individual më prestigjoz në Botë, por unë aktualisht nuk mendoj për Topin e Artë. Për momentin jam i përqëndruar te skuadra dua të ambientohem mirë me grupin dhe të jap më të mirën time për Paris Saint Germainin në mënyrë që të fitojmë shumë trofe”.
Aventura e Neymar te skuadra franceze, ka nisur në mënyrë ideale, me brazilianin që ka shënuar 5 gola në 5 ndeshjet e tij të para me parizienët.
“Jam bërë pjesë e një skuadre të madhe. Gjërat po shkojnë mirë për ne dhe besoj që i kemi të gjitha mundësitë për ti fituar të gjitha kompeticionet ku marrim pjesë në këtë sezon. Jam i kënaqur me paraqitjen time në këto 5 sfida të para, por më e rëndësishme është që ka fituar skuadra”. /tesheshi.com/
