Për herë të parë, kryeministri Rama ka cekur atë që pothuajse aspak nuk trajtohet, edhe pse ka të bëjë me fenomenin më shqetësues në Shqipëri e rajon: ikja masive, në veçanti e të rinjve drejt Gjermanisë.
Në Kongresin e partivë Socialiste në Berlin, Rama vuri në dukje këtë një lloj padrejtësie në këtë drejtim: faktin që Gjermania apo vende të tjera europiane tërheqin të rinjtë shqiptarë, ata që arsimohen nga taksapaguesit shqiptarë, e nga ana tjetër nuk japin asgjë.
Ajo çfarë duhet të japin, sipas Ramës, është njohja e diplomave, ku së paku, për çështjë arsimimi, të rinjtë të mos nxitojnë drejt Perëndimit.
“Nuk jemi vende të pasura dhe po shohim të rinjtë tanë, të rinjtë tanë më të mirë që largohen sepse nuk kemi të njëjtën qasje në sistemin europian të arsimit të lartë, që do të thotë universitetet tona nuk mund të krijojnë sinergjinë dhe të krijojnë rrugëtimin e përbashkët në universitetet në BE. 
Nga ana tjetër, shohim që edhe ata që i paguajmë me paratë e taksapaguesve tanë që të bëhen mjekë e infermierë merren nga Gjermania menjëherë.
Nuk duket e drejtë dhe nuk duket solidaritet europian që nga njëra anë të shohësh universitetet dhe të rinjtë e tu të vendit të lihen jashtë sistemit, duke u larguar nga vendi sepse duan të bëhen pjesë e këtij sistemi dhe me shumë të drejtë,e nga ana tjetër të shohim krahun tonë të kualifikuar të punës që merret nga tregu europian.
Natyrisht, e kuptoj që është tregu, por kjo duhet të jetë njëfarësoj e ekulibruar me një lloj solidariteti në kuptimin që vendet tona duhet të marrin diçka në këmbim.
Pra nëse nuk ka më gjermanë të rinj që duan të bëhen infermierë, jemi të lumtur të ndihmojmë, por po kështu duhet të ndihmohemi. Nuk mund të funksionojë vetëm në njërin kah”, tha Rama.
Kujtojmë se në debatin mbi ikjet trajtohet vetëm aspekti i brendshëm e jo faktori i jashtëm, posaçërisht ai gjerman, i cili në afro 8 vjet po josh e thith masivisht krah pune apo mendje nga Ballkani, duke i shkaktuar rajonit një dramë demografike. /tesheshi.com/
