Kisha Katolike në Shqipëri përcolli një deklaratë shqetësuese mbi ikjet, duke apeluar politikën që të bëjë ç’është e mundur për ta frenuar si fenomen.
“I drejtohemi mbi të gjitha klasës politike të vendit në mënyrë që ky problem të trajtohet me përparësinë më të madhe. Duke parë një situatë të tillë dramatike, na vjen të pyesim: Vendi i lënë bosh nga shqiptarët që emigrojnë, kujt do t’i mbesë? Kujt jemi duke ia dorëzuar këtë tokë? Cili është projekti për të ardhmen e këtij vendi? E gjithë kjo pasuri që gjendet në këtë tokë, në duart e kujt do të jetë? Nëse jemi demokraci nuk duhet të kemi frikë t’u përgjigjemi me kurajo këtyre pyetjeve të drejta dhe legjitime të qytetarëve tanë”, thuhet ndër të tjera Presidenti i Konferencës Ipeshkvnore Imzot Angelo Massafra, në një deklaratë lëshuar nga Shkodra.
Por nga ana tjetër, katoliku Rama, siç ai ka deklaruar besimin e tij, nuk e sheh dhe aq dramatikisht këtë situatë.
“…Është e pamundur, që t’u thuhet njerëzve rrini këtu, mos ikni, se këtu është atdheu. Njerëzit janë në të drejtën e tyre të marrin vendimet e tyre. Shyqyr zotit nuk jemi në bunkerin e komunizmit”, tha Rama nga Tropoja, gjithsesi jo duke mbështetur ikjet por nxitur qëndrimin këtu me investime sidomos në fshat. “Nëse në qytet mundësitë janë më të kufizuara, në fshat janë të pafundme.
Nëse në Tropojë sot vijnë rreth 1500 turistë, kjo do të thotë që ka një treg për këdo që jeton në fshat. Tregu është që me shtëpinë e vjetër dhe në tokën rreth e rrotull ti ke mundësi që të ndërtosh një pikë që të tërheqësh disa prej tyre”, tha Rama. /tesheshi.com/
