Ndahet nga jeta ish-trajneri “i mirë” italian, Azeglio Vicini. Ai drejtoi kombëtaren italiane në Botërorin e vitit 1990, që u zhvillua pikërisht në Itali, të cilin, sic ka deklaruar vetë Vicini, duhej ta kishin fituar, pasi nuk humbën kurrë. Italia në atë botëror, arriti 6 fitore dhe një barazim, duke u eleminuar me penallti nga Argjentina. Azeglio Vicini do të mbushte 85 vjec në muajin mars dhe ai la pas, bashkëshorten dhe 3 fëmijë.
I konsideruar si një trajner që e kanë dashur të gjithë, brenda dhe jashtë fushe, Vicini qëndroi si trajner i Italisë deri në vitin 1991, për t’ia lënë më pas stafetën Arrigo Sacchi-t.
Si futbollist, Vicini ka luajtur fillimisht me Vicenzan (1953-1956), për të kaluar më pas tek Sampdoria (1956-1963), e përfunduar tek Brescia ku luajti gjithashtu 3 sezone, për t’iu përkushtuar më pas trajnimit. Pikërisht tek Brescia, ai qëndroi në krye të pankinës për 5 vite, për të zhvilluar më pas karrierën edhe me klube të tjera.
Nga viti 1986 e deri në 1991, Azeglio Vicini u zgjodh trajner i Kombëtares italiane, ku revolucionarizoi konceptin e futbollit të vendit të tij. Pas shumë vitesh të një futbolli “catenaccio”, pra të një futbolli kryesisht mbrojtës, taktik, të fortë e të pisët, Italia e Vicinit, krijoi një fizionomi krejt tjetër, pasi u shfaq sulmuese e me qarkullim të shkëlqyer të topit, duke u kthyer në një skuadër spektakolare, ku shënonin të gjithë.
Jo më kot, në Botërorin e 1990-ës, shënuesi më i mirë, u shpall një sulmues krejt i panjohur deri atëherë, si Toto Schillaci. Për nder të ish-trajnerit të Kombëtares Azeglio Vicini, para fillimit të çdo ndeshjeje në Itali, qoftë ndeshje kupe apo kampionati në fundjavë, do të mbahet 1 minutë heshtje. /tesheshi.com/
