Një ndër regjisorët më të shquar teatrorë në Shqipëri, i tillë njëhërësh dhe në menaxhim, ish-drejtori i Teatrit Eksperimental Kiço Londo, komentoi ikjen nga kjo detyrë, pasi do zëvëndësohet nga një tjetër emër i njohur, babai regjisorial i Portokallisë, Altin Basha.
Por Londo nuk ka bërë teatër në shprehjen e asaj çfarë ndjente nga ikja si drejtor, ndonëse nuk e quante veten të tillë.
“Nuk dua që ta fsheh që ndihem i trishtuar edhe i keqardhur që më duhet për shkak te respektimit te institucioneve, nga kjo shërbesë t’i lë vendin drejtorit pasardhës.
Ndihem sikur më kanë larguar nga shtëpia ime. Bashkë me ata që nuk duken dhe që duken, kjo është ajo që më dhemb më shumë, pasi për një kohë të shkurtër kemi bërë një transformim të jashtëzakonshëm.
Unë nuk jam drejtor, s’kam qenë ndonjëherë drejtor, sepse drejtorët nuk janë si unë”, tha Kiço Londo në një dalje për median me në krah ministren Margariti dhe pasaradhësin Basha.
“Do vazhdoj t’ju shërbej, mbarësi të gjithëve”, tha Londo.
Kujtojmë se Kiço Londo ka vënë dër shfaqjet më të sukseshshme në repertorin e Teatrit Kombëtar, sidomos pas viteve 2000, ku ka qenë njëherësh dhe drejtor i TK-së për një kohë. Gjithashtu, ai njihet dhe si prodhimtar, gjë të cilën e theksoi në fjalën e tij.
“Jam i bindur që ketë që kemi arritur bashkë, jo fort të zakonshme, ku punojnë 21 vetë dhe secili ka vënë 23 shfaqje. Ndërkohë që institucionet e tjera e kanë 0.2 shfaqje për individ”, theksoi Londo, referuar përvojës së tij si drejtues i Eksperimentalit.
Nga ana tjetër, Londo i qëndroi larg debatit mbi fatin e godinës së TK, ku dhe Eksperimentali është shembur gjithashtu. Ai asnjëherë s’u prononcua nëse ishte për godinën e vjetër apo për një të re.
Kujtojmë gjithashtu se Kiço Londo ishte kandidat për deputet i PS-së në zjedhjet e vitit 2009, por nuk ka preferuar të angazhohet në politikë aktive.
Në kohën kur Rama ishte kryebashkiak i Tiranës, Kiço Londo do themelonte Teatrin Metropol.
Nga nga ana tjetër, regjisori Basha tha se Eksperimentali do ishte në frymën e punës së tij.
“Është pozicion ku kam njëfarë eksperience. Ka ndikimin e frymës së kërkimit. Është gjenerator i ditëve të reja dhe për një kohë të gjatë kam menduar si mund të reformohet teatri shqiptar në mënyrë që të fuqizohet alternativa.
Teatri e ka mundësinë për të qenë i tillë. Ky element ndoshta është arsyeja që mora pjesë në konkurs.
Për 10 -15 vjet kam punuar me artistë të rinj për ta çuar më tej frymën që ka ky teatër”, tha regjistori Altin Basha. /tesheshi.com/
