Të paktën 32 mijë qytetarë të Kosovës të larguar nga vendi në valën e ikjes, dy vjet më parë drejt vendeve të Bashkimit Evropian, janë riatdhesuar. Kështu, kanë bërë të ditur zyrtarë të Ministrisë së Punëve të Brendshme.
Riatdhesimi i tyre thuhet se është bërë qoftë në mënyrë vullnetare, në disa raste, por edhe me forcë.
Ushtruesi i detyrës së drejtorit të Departamentit për Shtetësi, Azil dhe Migracion në Ministrinë e Brendshme, Fitim Zariqi ka deklaruar se më se shumti qytetarë të kthyer, të cilët janë riatdhesuar, janë nga shteti i Gjermanisë dhe atë rreth 13 mijë në mënyrë vullnetare dhe mbi 11 mijë me forcë.
Të riatdhesuar, sipas Zariqit ka pasur edhe nga Austria, Franca, Belgjika dhe shtetet e tjera.
“Në periudhën 2015 – 2016 janë riatdhesuar 31,819 qytetarë të Kosovës. Riatdhesimi është duke vazhduar, mirëpo sfidë kryesore është riatdhesimi i të sëmurëve (sëmundje të llojeve te ndryshme), si dhe akomodimi i kësaj kategorie”, ka theksuar Zariqi, për Radio “Evropa e Lirë”.
Kujtojmë se mijëra kosovarë në mënyrë të paligjshme morën rrugën e migrimit drejt vendeve të Bashkimit Evropian, në fund të vitit 2014 dhe fillim të vitit 2015, duke shfrytëzuar kufirin e “brishtë” ndërmjet Serbisë dhe Hungarisë.
Vala e madhe e migrimit të qytetarëve nga Kosova detyroi autoritetet në Hungari, Serbi, Austri dhe Gjermani, që të forcojnë kontrollet e kufirit, për të penguar kalimin e paligjshëm. /tesheshi.com/
