Ka reaguar Vetëvendosje pas largimit prej saj të një prej figurave kyçe, Shpend Ahmetit, kreu të Komunës së Prishtinës.
Për VV-në, me aktin e dorëheqjes, Ahmeti u rreshtua kah atyre që punuan kundër Lëvizjes
“Fatkeqësisht Shpendi ka zgjedhur që megjithatë të mbaj anën e atyre personave që për mbi një vit e gjysëm punojnë brenda Lëvizjes, kundër Lëvizjes, persona të cilët në valën më të madhe të angazhimit për fushatë e për balotazh, e kalonin kohën nëpër takime informale për prapaskena, duke u marrë me thashetheme përçarëse e duke pritur të kryheshin zgjedhjet për të dhënë dorëheqjen”, thuhet në reagim.
“Ai vazhdimisht ka gëzuar mirëkuptim dhe mbështetje për kërkesat e veta, apo për ndonjë dyshim në qëllime e metoda, siç po thotë vetëm tani, nëpërmjet mediave. Mirëpo, ai ka patur më shumë mungesa sesa pjesëmarrje në mbledhjet e Kryesisë që janë mbajtur pas zgjedhjeve lokale, duke treguar për Lëvizjen një interes më të ulët sesa para se të fitonte mandatin e dytë. Përvetësimi i privilegjeve duke u distancuar nga obligimet është apetit tejet afatshkurtër me dobishmëri jetëshkurtër”, vijon reagimi.
Në fund, VV përpiqet të mos dorëzohet nga ikja e Ahmetit, duke zgjedhur dhe shprehje me përmbajtje revolucionare.
“Ne kalitemi nëpër sfida. Dhe, fitojmë. Dhe, do të fitojmë”. /tesheshi.com/
