Nga Blendi Gashi
Kryeministri Ramush Haradinaj ka mbajtur fjalën e dhënë ditë më parë se nuk do të qëndrojë në séance, nëse opozitarët e sulmojnë dhe nuk debatojnë për pikën e thirrur për programin e qeverisë.
Haradinaj pas akuzave të dy partive opozitare Vetëvendosje dhe LDK, të cilat kërkuan të tregojë se çfarë pazare janë bërë formimin e qeverisë dhe çfarë marrëveshje të fshehtë ka nënshkruar me Listën Serbe, kryeministri mori fjalën, por nuk iu përgjigj pyetjeve të parashtruara.
“Edhe 100 vjet të thirrni debate të tilla unë nuk do të vij. Unë ju kam dërguar programin qeverisës brenda jave. i mirë i keq e keni programin. Kurdo që dëshironi të diskutoni brenda programit unë ju vijë. Dua vetëm të diskutoj lidhur me ato që po aludoni lidhur me Listën Serbe. E vetmja marrëveshje që ka Ramush Haradinaj me Listën Serbe është që të punojmë në bazë të përgjegjësive dhe betimi është dhënë mbi Kushtetutën vendit. Nuk ka një germë të R.H që e turpëron familjen, vendin. Unë iu luta deputetëve të reflektonin”, tha Haradinaj, i cili më pas u largua nga Kuvendi, bashkë me anëtarët e qeverisë.
Por kjo seancë ashtu sikundër pritej nisi me akuzat e opozitarëve mbi mënyrën se si u formua qeveria “Haradinaj”, që sipas tyre ka lidhje me pazaret. Ata kritikuan vizitën e ministrave të Listës Serbe në Moskë, ndërsa paralajmëruan kryeministrin që të qëndrojë në sallë, në të kundërt nuk do kenë votat e tyre për marrëveshjet ndërkombëtare.
I pari e mori fjalën shefi i grupit parlamentar të Vetëvendosje-s, i cili tha se qeveria “Haradinaj” ka shpikur ministri dhe se kjo qeveri është në duart e dy deputetëve dhe varet nga teket e tyre.
“Këtu kemi ministri që janë shpikë me akomodu dosta. nga frika që kur të hiqen deputetët që bëhen ministra, atëherë vijnë me radhë deputetë nga partitë tjera, PDK është detyruar që asnjë deputet mos të jetë ministër”, ka thënë Konjufca.
Ai shtoi se janë edhe disa vota “të sigurta” për qeverinë të cilat sipas tij, janë si lloj “siguresash”.
Përplasja Veseli-Konjufca
Konjufca ka folur edhe për vizitën e Haradinajt në Tiranë, për të cilën u shpreh se ajo nuk ishte në Shqipëri, por në Rusi.
“Vizita e parë ka qenë në Moskë, pra nëse Lista Serbe është pjesë e Qeverisë, ata ditën e dytë kanë qenë atje e kanë falënderuar Putinin për mosnjohje të Kosovës”, ka shtuar Konjufca duke theksuar se Veseli akuzonte Vetëvendosjen, ndërsa Lista Serbe shkon në Moskë.
Por lidhur me këtë të fundit reagoi kryeparlamentari, Kadri Veseli i cili iu drejtua Konjufcës me “O Glauk Konjufca nuk je Zoti, me ia drejtu gishtin kujt e kur dush…”
“Kërcënimi i LDK-së për Ramushin”
Kreu i grupit parlamentar të LDK-së Avdullah Hoti, ka deklaruar se deputetët e kësaj partie nuk do të marrin pjesë në ratifikimin e marrëveshjes së IPA, nëse kryeministri Haradinaj nuk jep llogari lidhur me atë se si është formuar qeveria.
“Nëse ju nuk qëndroni për të dhënë llogari si është formuar qeveria, për pazaret politike, ne nuk do të qëndrojmë për votimin e marrëveshjes IPA që kërkon 2/3 votat e opozitës”, tha Hoti.
Hoti i ka kujtuar Haradinajt se pa opozitën ligjet që kërkojnë 2/3 e votave të deputetëve për t’u implementuar, nuk do të arrijnë të realizohen, nëse sipas tij kryeministri injoron partitë opozitare.
“Kjo është qeveria e parë që 17 vite është votuar pa debat parlamentar. Kryeministri i ka injoruar 59 deputetë të opozitës. Ju ftoj që të silleni në mënyrë konstruktive, nëse jo këto janë pasojat me të cilat do të përballeni”, tha Hoti.
Debati më pas ka vazhduar pa kabinetin qeveritar ku opozitarët kanë akuzuar se qeveria po ikën nga përgjegjësia, por partitë e pushtetit kanë mohuar një gjë të tillë duke thënë se opozitarët nuk janë të interesuar të debatojnë për programin e qeverisë, por vetëm të bëjnë akuza. /tesheshi.com/
