Partia e Ramush Haradinajt sa ishte në opozitë jo pak ka kritikuar të gjitha qeveritë dhe kryeministrat për mungesë në seanca plenare, për mos raportim para institucionit ligjvënës.
Por me të marrë pushtetin Haradinaj ka ndjekur rrugën e njëjtë dhe atë që në seancën e parë ku pikë e vetme e rendit të ditës ishtediskutimi për parimet programore të qeverisë së re me mandat 2017-2021.
Ikjen e tij Haradinaj e arsyetoi se nuk rri në një seancë ku qëllimi është të bëhen debate jashtë programit qeveritar, por se është i gatshëm të vjen në Kuvend ku diskutohet vetëm brenda programit.
Largimin e Haradinajt dhe minsitrave të tij nga Kuvendi, opozita e quajti ikje nga përgjegjësia duke thënë se është e vetmja qeveri nga paslufta që nuk ka guxim të përballet me deputetët për programin qeveritar.
Bojkoti i Kuvendit që në seancën e parë nga Haradinaj, nuk po shihet me sy të mirë as nga ish-deputetë dhe analistët politikë të cilët thonë se qeveria e ka për detyrë ta informojë Kuvendin për punën e saj dhe nuk duhet në asnjë mënyrë të ik nga përgjegjësia.
Ish-deputeti, njëherit kryetari i partisë FJALA, Gëzim Kelmendi, thotë se kryeministri Haradinaj dhe ministrat kanë obligim me raportu para deputetëve dhe jo të ikin.
“Mosgatishmëria e kryeministrit le shumë hapësirë për të gjykuar se mos plani qeverisës është jo i mirë, apo ai i frikësohet debatit me opozitën.
Pëndryshe edhe në dy mandatet e kaluara , kryeministrat dhe qeveria në të shumtën e rasteve kanë injoruar debatet në Kuvend”, thotë Kelmendi për tesheshi.com.
I pyetur se ç’pasoja mund të ketë qeveria “Haradinaj” nëse vazhdon avazin e njëjtë, Kelmendi thotë se mund të procedohet mocion për rrëzimin e qeverisë nga opozita, të cilës i duhet një votë për ta bërë një gjë të tillë.
Faik Krasniqi, njohës i rrethanave politike, thotë se çdo kabinet qeveritar e ka për obligim të qëndroj në sallë dhe para deputetëve të raportojë për progamin dhe objektivat e qeverisë.
“Konsideroj që është papërgjegjësi para qyetarëve mos qëndrimi në seancën plenare. Qytetarët e Kosovës duhet ta dinë se çfarë objektiva ka kjo qeveri për vendin dhe interesat e tyre. Herën tjetër ky gabim nuk duhet të ndodhë, sepse në sytë e popullit konsiderohet si ikje nga përgjegjësia, dhe qytetarët e Kosovës kryeministrin Haradinaj nuk e njohin si njeri që i ikë përgjegjësisë”, thotë Krasniqi për tesheshi.com.
Ai më tej thotë se pamundësia e zgjidhjeve të problemeve të akumuluara ndër vitesh, dhe zotimit të kryeministrit Haradinaj që do t’i zgjidh është një ndër arsyet, dhe prej kritikave që mund të përballet nga deputetët e opozitës, megjithatë sipas Krasniqit, mos qëndrimi në sallë nuk zgjidh asnjë problem, por vetëm akumulon akoma probleme tjera. /tesheshi.com/
