U shua këto ditë një prej emrave të regjimit komunist, Llambi Gegprifti, ish-ministër dhe figurë e lartë e PPSH-së, me të bijën emër të njohur si tekniciene afër PS-së, Sonila Qato.
Në një dedikim të kësaj të fundit për të atin, theksohet trashëgimia morale që ai ka lënë.
“Në këtë ditë të bukur fillim maji ti mbylle sytë përgjithnjë, duke na hidhëruar zemrën, për të qenë i pavdekshëm për ne vajzat e tua, mamin, nipërit e mbesat.
Na ke lënë pas pasurinë më të madhe, jetën tende të ndershme, emrin tënd që na ka bërë gjithnjë të ndihemi krenarë!
Lamtumirë babi ynë i shtrenjtë”, shkruan ajo.
Është interesante të theksohet se brezit komunist të asaj kohe i atribuohet morali në raport me materialen, duke u shmangur ai në raport me njerëzoren ose zhvillimoren. Në kontekst ideollogjik, morali i tyre është tejet i diskutueshëm, si njerëz që i shërbyen një regjimi diktatorial, në disa dhe ç’njerëzor.
Kujtojmë se pak para ndryshimit të sistemit, Llambi Gegprifti ishte kryetari i Komitetit Ekzekutiv të Tiranës. Si i tillë, atij do i takonte të ishte dhe në tribunën nga ku James Becker, ish-Sekretari amerikan i Shtetit, do u përcillte shqiptarëve mbështetjen e fortë amerikane për ndërrimin e regjimit, gjatë një vizite historike në vitin 1991.
Siç shihet në foto, i ndjeri Llambi Gegprifti ishte pas tij dhe pranë Elez Biberajt të VOA-s. /tesheshi.com/
