Ky është efektivi i “Shqiponja”-ve të Fierit që ndërroi jetë në moshën 28-vjeçare, nën uniformën blu, pasi u qëlluar, siç thuhet, “për një fjalë goje”, nga një 23-vjeçar, në Baltëz të Fierit.
Jetëhumburi, Novruz Cenalian, thuhet se kishte vetëm një muaj që ishte martuar. Ai që e qëlloi, 23-vjeçari Azgan Mernica, është në kërkim.
Ministri Balla, në një prononcim për rastin tragjik, tha:
“Dua që të shpreh në këtë rast dhimbjen që ndjej për humbjen e jetës të një punonjësi policie. Nxis Policinë e Shtetit dhe drejtuesit e Policisë që të bëjnë gjithçka për arrestimin e autorit. Do të bëjmë gjithçka që në këtë vend të ngulitet mirë që është e papranueshëm që të ngresh dorën ndaj një punonjësi policie.
Nuk dua të interpretoj informacionet paraprake. Ende nuk dihen arsyet e kësaj ngjarje. Përgjegjësia e parë që bie mbi Policinë është identifikimi i autorëve. Kam besim që forca kombëtare e Sigurisë, Renea dhe forcat e tjera që janë në operacion kërkimi të konkludojë. Dua t’i bëj një thirrje familjarëve dhe personit që rëndon akuza të dorëzohet”, tha ministri.
Norvuz Cenalia ishte jashtë shërbimi në kohën që u qëllua, por i veshur me uniformën e Policisë, pasi po shkonte për të marrë shërbimin. Sipas policisë, dyshohet se ngjarja ndodhi për një konflikt të çastit.
Autori është shpallur në kërkim, ndërsa kushdo që ka informacion të telefonojë në numrin pa pagesë 112, duke iu garantuar anonimatin. Për çdo informacion të vlefshëm, Policia e Shtetit ka vënë në dispozicion shpërblimin 30 000 euro. /tesheshi.com/
