Kryeministri në largim, Ramush Haradinaj ka reaguar ndaj zërave që e kanë përshëndetur largimin e këshilltarit amerikan për siguri, John Bolton.
Haradinaj ka thënë se as SHBA e as Bolton kurrë nuk kanë pasur plane për ndarjen e Kosovës, dhe se kjo ishte pjesë e fryrjes së propagandave serbe.
“Kam shumë respekt për ambasadorin Bolton, ai ka qenë një njeri i linjës parë për Amerikën. Sa i përket çështje së Ballkanit dhe Kosovës mendoj që gabimet kanë ndodh në Ballkan e jo në Uashington, pra i kanë shkuar sugjerime të gabuara prej udhëheqësve të Ballkanit, kuptohet, prej presidentit Vuçiç. Por, janë bërë gabime edhe prej tjerëve”, ka thënë Haradinaj në një konferencë me gazetarë në Prishtinë.
Ai ka thënë se institucionet e sigurisë të Amerikës e mbrojnë Kosovën, pasi që Kosova është vijë e frontit kundër ndikimit rus në Evropë. /tesheshi.com/
