Top Channel ka zgjedhur ta shoqërojë lajmin e ikjes përfundimtare të Ben Blushit nga PS-së, me një ndër momentet më të kompromentuara të karrierës së tij politike si ish-ministër, atë të firmosjes së një vendimi për import plehrash kur ishte pjesë e kabinetit “Nano” në vitin 2003.
Top Channel, citon letrën e largimit të Blushit plot fraza irrituese kundrejt ligjit të mbetjeve – pra si shkaku që i dha fund raporteve të tij me PS-në, a Ramën më saktë – e më pas del aty, tek dritëhija morale e tij: “Por ajo çfarë nuk thuhet në letrën e Ben Blushit është se historia për lejimin e importit të mbetjeve në Shqipëri nuk është e këtyre 6 viteve të fundit. Ajo nis në vitin 2004, kur Ben Blushi bashkë me dy ministra të tjerë të qeverisë “Nano” firmosën një memorandum, që i hapte rrugën qeverisë të negocionte një marrëveshje koncesionare me një kompani të Francesco Beçhettit, për të importuar mbetje nga Italia dhe për t’i djegur në Shqipëri nëpërmjet një impianti i parashikuar për t’u ngritur në Kashar. Atëherë, Ben Blushi ishte në studiot televizive jo për të kundërshtuar importin, por për të shpjeguar negociatat për termat e koncesionit”, thuhet në kronikën e Top Channel mbi largimin e Blushit. /tesheshi.com/
