Miliarderi amerikan George Soros dhe djali i tij Alexander kanë shprehur mbështetjen e tyre që Kamala Harris të jetë kandidatja demokrate në zgjedhjet e nëntorit në SHBA, pasi Joe Biden u tërhoq.
Alexander Soros ishte i pari që u shpreh publikisht me postimin e tij në X të dielën mbrëma, menjëherë pas shpalljes së mbështetjes së Biden për Harris.
“Është koha të bashkohemi rreth Kamala Harris dhe të mundim Donald Trump”, ka shkruar djali i George Soros në postimin e tij.
Disa orë më vonë një përfaqësues i miliarderit amerikan i cituar nga Wall Street Journal deklaroi se “George Soros gjithashtu mbështet Kamala Harris”.
Postimi i djalit të George Soros
“Është koha që të gjithë ne të bashkohemi rreth Kamala Harris dhe të mundim Donald Trump. Ajo është kandidatja më e mirë dhe më e kualifikuar. Jeto ëndrrën amerikane #Harris2024.”
Në një tjetër postim në Instagram, Alexander Soros i falënderon Joe Biden, duke shkruar:
“I shkruaj këto fjalë me zemër të rëndë. Joe Biden është një patriot, një njeri që gjithmonë ka punuar për të bashkuar Amerikën dhe për të mbrojtur dinjitetin dhe jetën e mirë të amerikanëve. Ai bëri më shumë në katër vjet nga sa mund të priste dikush për tetë vjet. Ai do të mbahet mend si një hero amerikan sepse është i tillë. Faleminderit për shërbimin tuaj.” /tesheshi.com/
