Patriarku i Kishës Ortodokse Serbe, Irinej, u shua për shkak të COVID-it, duke pasuar homologun e tij të Malit të Zi, Amfilohije, i cili ndërroi jetë afro dy javë më parë dhe të cilit i mbajti meshën në Podgoricë.
Patriarku Irinej (Gavriloviç), i lindur në fshatin Vidova, afër Çaçakut, në 1930, ishte një figurë me ndikim në jetën fetare dhe politike të Serbisë.
Emri i tij laik ishte Mirosllav.
Ai përfundoi shkollën fillore në Vidovo, dhe pastaj shkollën e mesme në Çaçak, seminarin në Prizren dhe Fakultetin Teologjik në Beograd. Ai më pas u emërua profesor i seminarit të Prizrenit, dhe më vonë rektor i tij.
Patriarku Irinej trashëgoi fronin e Kishës Ortodokse Serbe në 22 janar 2010, në asamblenë në Beograd, si kryetari i saj i 45-të.
Duke sjellë biografinë e patriarkut të ndjerë, agjencia Beta kujtoi mosmarrëveshjet në kupolën e Kishës kur Irinej i dha Presidentit të Serbisë, Aleksandër Vuçiç, Urdhrin e Shën Savës, duke pranuar “politikën e tij në Kosovë”. Për shkak të kësaj, disa kryepeshkopë protestuan, duke besuar se kjo politikë ishte në kundërshtim me interesat kombëtare të Serbisë.
Në kremtimin në Beograd, kushtuar jubileut – tetë shekuj autoqefali të Kishës Ortodokse Serbe, Patriarku Irinej gjithashtu dekoroi Milorad Dodikun e Republika Srpska, të cilit ai gjithashtu nuk ia fshehu dashurinë.
Mediat boshnjake kujtojnë se Irinej qe nga ata që mohoi gjenocidin në Srebrenica
Pasi gjykata e Hagës dënoi ish-gjeneralin famëkeq Ratko Mlladiç për gjenocid në Srebrenicë, Irinej tha se vendimi pritej dhe ishte i bindur se vendimi, si çdo tjetër, ishte kundër serbëve, “sepse fuqitë e fuqishme botërore po bëjnë vepra djallëzore”.
Kosova ishte një pjesë e gjithmonshme e adresimeve të Patriarkut Irinej. Ai përsëriste papushim se Serbia nuk duhet të heqë dorë nga Kosova, sepse atëherë ajo do jetë e humbur në mënyrë të pakthyeshme, ndërsa, siç thoshte, ajo që u rrëmbye mund të kthehet një herë.
Duke folur për ngjarjet politike ndërkombëtare, ai thoshte se Serbia duhet ta lidhte anijen e saj të vogël me atë të madhe ruse.
Menjëherë pas zgjedhjes së tij, ai i dha Urdhrin e Shën Savës kryeministrit të atëhershëm të Rusisë, Vladimir Putin, në Beograd, të cilët iu sugjerua më parë nga Patriarku Pavle. /tesheshi.com/
