Dy gjysmëfinalet e këtij Europiani kanë përfunduar me rezultat të njëjtë: 2-0. Fillimisht, një natë më herët ka triumfuar Portugalia ndaj Uellsit, e sonte ka qenë radha e Francës të dërgojë në shtëpi Gjermaninë.
Finalistët janë dy skuadra me të cilat Shqipëria ka qenë në një grup në eliminatoret e Euro 2016-tës. E për ironi të fatit i ka mundur të dyja!
Gjysmëfinalja e kësaj mbrëmjeje ka patur për protagoniste një Francë krejtësisht në rritje, që vinte pas një fitoreje 5-2 ndaj Islandës. Ndryshe saj, Gjermania kishte përballuar një 120-minutësh të lodhshëm ndaj Italisë, për t’u kualifikuar pas gjuajtjeve të 11-metërshave. Përpos kësaj, Gomez, Khedira e Hummels ishin mungesa vështirë të kapërcyeshme.
Pjesa e parë e këtij takimi do të mbizotërohej nga një Gjermani më këmbëngulëse, ndërsa të zotët patën vetëm një rast. Atë të Griezmann-it, me një gjuajtje që do të pritej mjeshtërisht nga Neuer.
Momenti më kritik i takimit do të ishte minuta e 45-të, kur për Francën akordohet një 11-metërsh. Griezmann godet saktë dhe shënon.
E nisur 1-0 për Francën, pjesa e dytë do të ishte e tëra për gjelat, që do ta thellonin rezultatin dhe më tej
me të njëjtin golashënues. Diçka që do të ngjiste në minutën e 72-të, kur edhe shifrat shkojnë 2-0 për organizatorët e këtij kampionati.
Gjermanët do të kishin rastet e tyre, por që nuk do të mund t’i finalizonin. Për ta është e vështirë, por ja që është dashur ta ndërpresin këtu rrugëtimin e tyre.
Lojtari i ndeshjes qe Griezmann, që do të deklaronte: “Jam shumë i kënaqur. E dinim se do të ishte shumë e vështirë, dhe qëndruam fort në mbrojtje; portieri ynë luajti shumë mirë. Kundër Portugalisë është 50 me 50. Gjithçka mund të ngjasë në një finale.”
Griezmann, kandidati kryesor për lojtarin më të mirë të Europianit, do të përballet në finale me Ronaldo-n, ndaj të cilit e humbi sfidën javë të shkuara në një tjetër finale, në atë të Champions League-s. Vetëm të dielën në darkë do të mësohet se cili do të buzëqeshë këtë herë. /tesheshi.com/
