Ka vdekur dje në Berlin, në moshën 86-vjeçare, njeriu që në mënyrë të paqëllimshme do të hapte rrugën për rënien e Murit të Berlinit.
Ish-zëdhënësi i komitetit qendror të partisë komuniste në Gjermaninë Lindore, Guenter Schabowski, do të njoftonte më 9 nëntor të vitit 1989 se, sipas një dekreti, do të jepeshin lirisht viza për ata që kërkonin të udhëtonin jashtë vendit.
Kaq do të mjaftonte që buletinet e lajmeve të gëlonin nga titujt për rënien e Murit të Berlinit. Mijëra gjermanolindorë do të turreshin në pikëkalimet për në pjesën tjetër të Gjermanisë.
Masa e madhe e njerëzve bëri që të hiqej njëra prej pengesave, e ata të vërshonin për në anën tjetër të vendit.
Dy Gjermanitë do të bashkoheshin gati një vit më vonë, duke i dhënë fund ndarjes së Luftës së Ftohtë. Rënia e Murit të Berlinit u pasua nga një reaksion zinxhir në tërë vendet e Europës Lindore, ku komunistët u detyruan ta lënë pushtetin. /tesheshi.com/
