Ish-lojtari dhe ish-trajneri i Milanit dhe i Italisë, Cesare Maldini i ka mbyllur përgjithmonë sytë natën e shkuar në moshën 84-vjeçare.
Ai lindi në shkurt të vitit 1932 në Trieste, për t’u bërë në vitet ’60 një prej futbollistëve më të mirë e më të spikatur të Milanit e të kombëtares italiane.
Në vitet 1954-1966 do të luante 347 ndeshje me bluzën e Milanit, kurse më 1962-1963 do të ishte dhe kapiteni i përfaqësueses së vendit të tij.
Në karrierën si trajner do të ulej në dy periudha në stolin e Milanit, për të drejtuar më pas dhe Italinë e Paraguajin.
Cezare Maldini ishte ndihmësi i Enzo Bearzot-it kur Italia fitoi Kupën e Botës të vitit 1982. Një pjesë të mirë të karrierës së tij trajnuese do t’ia kushtonte kombëtares italiane të moshave nën 21 vjeç .
Në vitin 1996 do të zëvendësonte Arrigo Sacchi-n në stolin e përfaqësueses italiane, për ta drejtuar ekipin në botërorin e Francës dy vite më vonë. Katër vite më pas, në vitin 2002, do të ishte përsëri në një Kupë Bote, por këtë herë si trajner i Paraguajit.
I biri i tij, po ashtu, Paolo Maldini, do të bënte emër me Milanin dhe me kombëtaren e Italisë. Tradita e familjes Maldini vijon aktualisht me nipin e Cezare Maldini-t, Christian-in, që luan për ekipin e të rinjve të Milanit. /tesheshi.com/
