Nga Mensur Krasniqi
Një lagje si “Serova” e Shkupit është bërë lakmi për të gjithë. Në atë lagje, e banuar në shumicë nga shqiptarët, zotëron një moto e jetës mes fqinjëve, “një për të gjithë e të gjithë për një”. Nuk ka të bërë kjo me ndonjë stil komunist të jetës, pra që e përshkon ndonjë fill i kuq ideologjik, meqë kredoja në fjalë vjen nga ai sistem, por është fryma komunitare që e shoqëron bashkëjetesën e atyshme, ku çdo kush ndihet fqinj me tjetrin, e sheh si të tillë, e respekton dhe i vjen në ndihmë kur ka nevojë. Dhe kjo frymë, shpërfaqet fort gjatë muajit të Ramazanit, ku banorët shtrojnë një iftar mes vedi në një ambient të hapur publik. Pra janë fqinj me fqinj, që afrohen dhe më shumë përgjatë Ramazanit, një gjë për të cilën ka nevoja sot jeta komunitare kudo.
Dhe kjo është hera e dytë që banorët e lagjes “Serovë” nën iniciativën e organizatorit 27vjeçar, haxhi Driton Jakupit, po praktikojnë shtrimin e e një iftari të tillë, me qëllim të solidarizimit dhe afrimit të gjithë fqinjëve, të pasur e të varfër, në një tavolinë të përbashkët. Me këtë, sipas haxhi Dritonit, sa kënaqen fqinjët, shpreson të jetë i kënaqur dhe Zoti me robërit e vet.
“Unë, së bashku me disa nga fqinjët, qysh para një viti vendosëm të organizojmë një iftar të përbashkët. Dhe këtë traditë e vijuam sërish, e që inshallah të vazhdojë më tutje. Nuk ka kënaqësi më të madhe për Zotin, kur t’i sheh të bashkuara zemrat e robërve të tij në këtë muaj të begatisë”, u shpreh haxhiu në moshë të re, Driton Jakupi.
Nga ana tjetër, Semir Neziri, njëri ndër të pranishmit në këtë iftar, ndjehet krenar me fqinjët e tij, duke thënë se kësisoj organizimi nuk mund të shijohet në kurbet.
“Falenderimet i takojnë Zotit që ndodhem në mesin e familjarëve dhe fqinjëve në këtë muajin e Ramazanit. Ndjehem jashtëzakonisht i emocionuar kur pranë meje shoh një solidarizim të mirëfilltë të fqinjëve. Kësi lloji të kënaqësisë nuk përjetohet dot në Suedi”, shprehet për tesheshi, Semir Neziri që jeton në vendin skandinav.
Në fund, organizatorët e iftarit urojnë që ky organizim të shndërrohet në traditë edhe për brezat e ardhshëm të kësaj lagjeje, dhe të shërbejë si shembëlltyrë për lagjet, qytetet, gjegjësisht shtetet tjera kudo që jetojnë besimtarë muslimanë.
Jo rastësisht, për Shkupin, hoxha i njohur Bekir Halimi ka thënë se “nëse ke para, për Ramazan shko në Meke(Qabe); nëse s’ke, shko në Shkup). E gjithë kjo për shkak të atmosferës së këndshme të muajit të bekuar të Ramazanit që krijohet në këtë qytet, diçka që së fundmi me organizimin e tyre e dëshmuan edhe banorët e lagjes “Serovë”. /tesheshi.com/
