Një iftar i organizuar në ambientet e shkollës “Krste Petkov Misirkov” në qytetin e Radovishit, në Shtip të Maqedonisë, vijon të jetë në qendër të një debati publik në këtë vend, ku marrin pjesë shumë aktorë, prej niveleve institucionale e deri tek rrjetet sociale. Kjo edhe për faktin se gjithçka ka ndodhur aty ky maqedonasit janë dominues si enti. Dhe iftari, ndër të tjera, është parë dhe si një sfidë nacionale.
Sipas kreut të komunës së Radovishit, Gerasim Konzulov, shkollat nuk janë vende për organizime të ritualeve fetare, dhe këtë e bazon duke iu referuar karakterit sekular të shtetit.
“Ligji thotë që institucionet arsimore nuk janë vende për organizimin e ritualeve fetare. Ekzistojnë vende tjera adekuate ku mundet të mbahen ngjarje me karakter fetar”, tha Konzulov për tesheshi.com.
Reagim pati dhe nga VMRO-ja lokale, me një gjuhë tejet të ashpër.
“Ky është një veprim i paligjshëm dhe dhe i pamoralshëm! Presim që të gjitha shërbimet kompetente t’i ndërrmarin gjitha masat e pashmangshme për zbardhjen dhe dënimin e këtij rasti. Fatkeqësisht, në vend se nëpër shkolla të ndërtojmë tolerancë fetare dhe bashkëjetesë, disa struktura mundohen që të shkaktojnë provokime dhe urrjetje fetare. I thërrasim të gjitha bashkësite fetare në formë publike ta gjykojnë këtë veprim dhe në të ardhmen mos të lejojnë që nxënësit të bëhen pjesë e ritualeve fetare. E thërrasim edhe drejtoreshën e shkollës, zonjën Olgica Stojanova që për arsye morale të japë dorëheqje”, ka qenë reagimi VMRO-së në Radovish.
Por nga ana tjetër myftiu i Shtipit, Nasir Rexhepi, e ka parë si normale organizimin e iftarit në ambientet e shkollës
“Në myftini më erdhën tre mësimdhënës që e organizuan iftarin. Biseduam gjerë e gjatë. Sipas informacioneve që i mora nga ata, festat e religjioneve tjera festohen shumë më hapur, në të cilat marrin pjesë edhe nxënësit që nuk i përkasin atij besimi. Iftari është organizuar me qëllim shumë të mirë. Presim dhe dëshirojmë që autoritetet të mendojnë në mënyrë të qetë dhe të marrin vendim të drejtë, me qëllim që të mos dëmtohet atmosfera e Ramazanit”, deklaroi myftiu Rexhepi.
Madje sipas tij edhe ezani i thirrur aty është diçka krejt normale, si para fillimit të çdo iftari. “Ezanin e ka thirrur një mësues që ka ligjëruar lëndën e religjionit dhe jo ndonjë hoxhë tjetër ashtu siç pretendojnë autoritetet shtetërore”, tha ai.
Përveç të tjerash, myftiu për rastin në fjalë tha se ka biseduar edhe me kreun e BFI-së, Sulejman Rexhepin, ku pra gjithçka ka qenë transparente.
“Bisedova edhe me kreun e BFI-së. Biseduam edhe me disa autoritete që i njohim, ua transmetuam rastin. Theksoj se ky iftar ka qenë diçka shumë normale, diçka e rregullt. Por tani, për fat të keq disa persona po e devijojnë në të tjera drejtime debatin. Po ushtrohet presion psikologjik mbi fëmijët dhe mësimdhënësit”, theksoi myftiu Rexhepi.
Gjatë ditëve të fundit mediat bënë të ditur se Inspektorati Shtetëror i Arsimit për shkollën në Radovish, paralajmëroi gjobë prej 1.600 euro dhe 1.120 euro për drejtoren e shkollës, Olgica Stojanova, ndërkohë që kryetari i komunës ka në plan dhe rekomandim për shkarkimin e saj nga detyra.
E ndërkohë që autoritetet maqedonase janë shprehur të irrituara nga organizimi i këtij iftari në një institucion shkollor shtetëror, është sjellë në kujtesë fakti se në vitin 2008, pikërisht atëherë kur shkolla “Krste Petkov Misirkov” ka hapur dyert për herë të parë, është mbajtur akti i shenjtërimit të saj nga kreu mitropolisë së Bregallnicës, z.Ilarion.
Më pas pati një varg lajmesh në gjuhën maqedonase ku thuhej se nxënësit në qytetin e Probishtipit ishin dërguar në kishë për lutje dhe fillim të mbarë të vitit shkollor. /tesheshi.com/
