Imazhe tronditëse janë postuar online në të cilat tregohet sesi banorët e qytetit të rrethuar të Dumës- periferi e kryeqytetit sirian, Damaskut – janë shtruar për iftar rreth një tryeze plot ngjyra të rrethuar nga shkatërrimi dhe rrënojat e trishtuara gri.
Darka u shtrua në mjedis të hapur nga fondacioni sirian, Adaleh Foundation, themeluar në vitin 2012 me qëllimin për të ndihmuar zonat lindore të kontrolluara nga kryengritësit. Ushqimi shërbehet për dhjetë ditët e fundit të muajit të shenjtë të agjërimit.
“Do kishim qenë të kujdesshëm në organizimin e darkave të tilla në mjedis të hapur, për shkak të sulmeve ajrore, mirëpo po përfitojmë nga marrëveshja e fundit e armëpushimit”, tha një zyrtar i fondacionit nga selia në Turqi.
Çmimi i ushqimeve në Siri është rritur së tepërmi për shkak të konfliktit. Ushqimi për Iftar u përgatit në pjesët e tjera të zonës dhe u soll në Duma, që ndodhet e rrethuar prej katër vjetësh, tha zyrtari në fjalë. /tesheshi.com/
