Janë dashur 33 vjet protagonizëm politik që në krye të tyre Berisha të pohojë se dikur, nën diktaturë, pra në kohën kur ka bërë dhe jetë partie si komunist, paska patur një idhull dhe ky paska qenë amerikan.
“Do t’u rrëfej një gjë shumë private. Çdo njeri ka idhujt e vet. Idhulli i jetës time ka qenë Martin Luter King. Kur unë kam gjetur tezat dhe shkrimet në diktaturë, ai më ka impresionuar dhe më ka ndikuar. Ai frymëzonte çdo njeri që lufton për të vërtetën. Kjo është përgjigjja për mesazhin”, tha ai në një intervistë televizive, në përgjigje të një qëndrimi të përsëritur amerikan se “non grata” ndaj tij nuk do hiqet.
Çështja është se Luter King nuk luftonte për të vërtetën, pasi nuk ishte nën akuzë për diçka; ai luftonte për të drejtën në emër të së drejtës për t’u ndjerë i barabartë me të bardhët. Kështu që krahasimi çalon rëndë. /tesheshi.com/
