Një skermiste nga Nju-Xhersi, Ibtihaj Muhammad mori pjesë javën e shkuar në një aktivitet në Athinë, gjatë së cilit u shpërblye me medaljen e bronzit, e mjaftueshme që ajo të sigurojë një vend në ekipin amerikan që do të marrë pjesë në Lojërat Olimpike.
Ajo ka për t’u bërë kështu atletja e parë amerikane që do të garojë në Lojërat Olimpike me shami koke.
“Dua të jap një shembull se me këmbëngulje gjithçka është e mundur,” është shprehur e kënaqur skermistja muslimane.
30-vjeçarja që garon në sportin e skermës thotë se kërkon të marrë pjesë në Lojërat Olimpike duke
përfaqësuar SHBA-të për të treguar se raca, feja apo gjinia nuk duhet të jenë pengesa në udhën për të arritur objektivat.
Lojërat Olimpike do të zhvillohen në Brazil gjatë gushtit të këtij viti, dhe megjithëse ekipi amerikan do të shpallet në fillim të prillit, skermistja me shami koke i ka mbledhur pikët e nevojshme për të qenë pjesë e tij.
Ibtihaj Muhammad e nisi skermën në moshën 13-vjeçare, pasi prindërit e saj kërkonin një sport ku ajo t’i përmbahej veshjes muslimane. Dhe skerma është një sport i tillë, që kërkon mbulimin tërësor të trupit.
Sporti i skermës, sipas Ibtihaj-it, është rezervuar historikisht për të “bardhët me para”, e ky nuk është një përfaqësim i mirë i shoqërisë amerikane.
Një afrikanoamerikane, Ibtihaj Muhammad u vu në qendër të vëmendjes vite të shkuara, kur u bë e para femër muslimane që do të garonte në skermë për Shtetet e Bashkuara të Amerikës. E sot ajo gjendet edhe një herë në qendër të vëmendjes, si e para sportiste amerikane që do të garojë në Lojërat Olimpike me shami koke. /tesheshi.com/
