Zlatan Ibrahimoviç do të luajë të paktën edhe për një sezon me Manchester United. Kështu shkruan britanikja “Express”, e cila hyn edhe në detajet e marrëveshjes që klubi dhe lojtari kanë arritur. Sipas kësaj gazete, suedezi pritet t’i bashkohet skuadrës pasi të përfundojë procesin e rikuperimit fizik, pas dëmtimit të rëndë që pësoi në fund të sezonit që u mbyll.
Pas kësaj faze, klubi do t’i ofrojë fillimisht një kontratë 1-vjeçare, me opsion zgjatjen e saj. Ndërsa enturazhi i sulmuesit ka përcjellë “kushtin” e Zlatan, i cili thotë se do ta pranojë ofertën, nëse deri në atë moment, Manchester United do të ketë arritur rezultate pozitive në Premier League dhe aktivitetet e tjera, ku përfshihen kupat dhe përfaqësimet ndërkombëtare.
Nëse ndodh e kundërta, Ibrahimoviç do të shqyrtojë disa oferta që kanë mbërritur mbi tryezën e tij, nga disa skuadra të kampionatit në Shtetet e Bashkuara të Amerikës. Pak kapriçoz Ibra, por falë talentit të padiskutueshëm, klubet “kanë qenë të detyruara” t’ia pranojnë tekat.
Megjithëse me një trajner si Mourinho, e me një “rival” në sulm si Lukaku, Ibra nuk do të jetë edhe aq “i paprekshëm” në 11-shen e Manchester. Edhe numrin 9 në fanellë, tashmë e mban belgu Lukaku, i cili ndoshta do ta detyrojë suedezin të ndryshojë përveç numrit në bluzë, edhe rolin në fushë…për të mos thënë në stolin e rezervave. /tesheshi.com/
