Suedezi është 34-vjeç, në të tatëpjetën e karrierës së tij futbollistike, por asgjë nuk e pengon atë që të bëhet fenomeni i Premier League-s në këto javë të para. Tre gola në dy javë për Zlatan Ibrahimovic-in, sulmuesin e Mançester Junajtedit, e gjashtë pikë për “djajtë e kuq”. Përpos një goli në superkupë ndaj Lestër Sitit, realizimi i së cilit i dha trofeun Man. Junajtedit.
Nisje e përsosur për Zlatan Ibrahimovic-in, e po aq e përsosur për ekipin e tij. Në “Old Trafford”, ndaj Sauthemptonit, në javën e dytë të kampionatit anglez, ka qenë festë për 75.326 tifozët e pranishëm.
Një fitore 2-0 në ndeshjen hapëse të kësaj jave, me të dy golat që mbajnë firmën e Ibrahimovic-it. Mançester Junajtedi i këtij sezoni duket krejt tjetër nga ai i tre viteve të fundit. Po kthehen kohët e arta të Ferguson-it? Herët ta thuash, por shenjat janë pozitive, janë shumë premtuese!
Një tjetër e veçantë e kësaj ndeshjeje të së premtes ka qenë debutimi i Paul Pogba-së, që është rikthyer pas katër vitesh aty ku nisi karrierën. E jo siç pati deklaruar Mourinho, por ka qenë një debutim i plotë, 90-minutësh. Vetëm goli i ka munguar Pogba-së, që do të kishte qenë qershia mbi tortë. Gjithçka tjetër shkoi siç duhet. Pogba tregoi se transferimi i tij, pavarësisht shumës së fryrë, ka qenë i duhuri.
Nga takimet e tjera të Premier League-s për këtë fundjavë veçohen dy prej tyre. Stouk Siti dhe Mançester Siti përballen sot në 13:30 mes tyre, një sfidë vërtet interesante. Kurse më e forta ndeshje është ajo mes kampionëve të Lestër Sitit dhe Arsenalit, që luhet po sot, në 18:30. Lestëri vjen pas humbjes në javën e parë ndaj Hall Sitit. Nga humbja vjen dhe Arsenali, që të dielën e shkuar u mposht 3-4 në Londër nga Liverpuli. /tesheshi.com/
