Kualifikimi i Suedisë për në Botërorin e Rusisë, duket sikur i ka shtuar “oreksin” legjendës nordike të futbollit, Zlatan Ibrahimoviç. 35-vjecari që është në periudhë riaftësimi pas dëmtimit që pësoi muaj më parë kur luante me Manchester United, ka lënë “një dritare” hapur për mundësinë e rikthimit për të luajtur me kombëtaren e vendit të tij, prej së cilës është tërhequr rreth 1 vit më parë, pasi theu të gjithë rekordet e golave të shënuar.
Në një intervistë dhënë në vendlindje, Ibrahimoviç ka insistuar se nuk ka ndërmend të tërhiqet ende nga futbolli i luajtur. “Do të kthehem edhe më i fortë e do të rifitoj Botën. Mbase dikush mendon se do të tërhiqem nga futbolli, por objektivi im është të rikthehem shpejt. Nuk e di nëse do të jetë e mundur të luaj për Suedinë sërish, por unë do të jem gati të jap kontributin tim, nëse vendi më kërkon ta bëj këtë. E sigurt është që do të rikthehem në një formë që nuk e keni parë” – ka qenë deklarata e Big Zlatan, lojtarit më të mirë nordik të dekadave të fundit.
Megjithatë, pas këtij lajmi, jo të gjithë janë dakord me rikthimin e Ibrahimoviç në kombëtare.
Sondazhet e nisura nga mediat për këtë fakt, nuk kanë qenë shumë pro rikthimit të gjigandit të tyre, kryesisht me argumentin se në Botëror duhet të luajnë ata që fituan “me djersë” kualifikimin për në evenimentin më të madh të futbollit. /tesheshi.com/
