Një ndër më të urryerit nga LGBT, pastori Akil Pano, u nderua nga Presidenti Meta me titullin e lartë “Kalorës i Urdhrit të Skënderbeut”, për kontributin që ka dhënë në forcimin e bashkëjetesës e harmonisë fetare.
Në fakt, në motivacion thuhet diç tjetër, ajo për të cilën Pano është ngrënë “dhëmbë për dhëmbë” me komunitetin e homoseksualëve në Shqipëri, pasi ka bara çmos, së bashku me përfaqësues të komuniteteve të tjera që Kodi i Familjes të mos shpërfytyrohej sipas tekave të tyre. Pra, ku babai dhe nëna të ishin prindëri 1 dhe prindëri 2.
“Me rastin e Ditës Ndërkombëtare të Familjes, pata kënaqësinë të vlerësoj një personalitet të dalluar në jetën civile dhe fetare të vendit, një avokat publik në mbrojtje të institucionit të familjes dhe jetës, Pastor Akil Pano”, shpreh Meta.
Meta vuri në dukje se, si nismëtar dhe themelues i lëvizjes qytetare “Koalicioni Shqiptar Pro Familjes dhe Jetës”, ai ka spikatur si promotor i vlerave të larta morale, qytetare, kombëtare dhe të solidaritetit njerëzor.
“Për përkushtimin e spikatur për kauzën e mbrojtjes së familjes dhe për mbështetjen ndaj personave në nevojë dhe me aftёsi ndryshe, i akordova titullin e lartë ‘Kalorës i Urdhrit të Skënderbeut’”, tha Presidenti, teksa shtoi se, “si udhëheqës i Vëllazërisë Ungjillore të Shqipërisë i jemi falenderues Pastor Panos edhe për kontributin në forcimin e bashkëjetesës e harmonisë fetare në vendin tonë, një vlerë e jashtëzakonshme kombëtare, me të cilën krenohemi dhe që mbetet një shembull frymëzues për të gjithë botën”. /tesheshi.com/
