Pedagogu Arlind Qorri i është përgjigjur një shpotie tipike të kryeministrit Rama ndaj tij, si “Sude me gjyslyke”, duke zgjedhur ta quajë “injorant që s’ka lexuar…”.
Në fakt, çdo gjë është e diskutueshme te Rama veç faktit që ai është injorant. Mes shumë të diskutueshmeve është madje morali i tij, siç dhe etika në shumë raste, por kurrë padija. Madje, ajo që e bën të diskutueshëm moralin e Ramës është që fakt se duke mos qenë injorant në çështje të caktuara, mban qëndrime që shpërfaqin padije ose injorancë. Si fjala vjen, bën paralele mes konfliktit Kosovë-Serbi me Gjermani-Francë, në funksion të idesë se të parat mund të bëjnë paqe mes njëra-tjetrës siç e bën të dytat, por që e di fare mirë që janë dy konflikte të natyrave të ndryshme.
Duhet kujtuar madje se ishte pikërisht një nivel i spikatur inteligjence ai që e afirmoi menjëherë Ramën në vitet ‘90-të si një aktor të admirueshëm të antikomunizmit. Më pas, edhe pa qenë aktor politik, ai do mbante kuotimin më të lartë në sferën publike të interesit publik për t’u ndjekur apo dëgjuar. Si shembull, gazeta Koha Jonë ku ai u shkruante apo jepte intervista, kishin disafishim tirazhi kur në tituj të faqes së parë fekste emri i Edi Ramës, pakrahasueshmërisht me raste të tjera imponuese.
Dhe një speficifikë të tillë profili publik nuk e ka sot askush nga ata që tentojnë ta rivalizojnë politikisht Ramën, sidomos emrat që vijnë nga shoqëria civile. Qorrin dhe ata, nëse i dëgjon kur flasin, pa e ditur se aspirojnë për kryeministër, kurrë nuk të shkon mendja për diçka të tillë. Ai ose ata, çdo gjë mund të jenë, por kurrë kryeministra.
Pse? Sepse as pedagogu në fjalë e as ata, nuk rrezatojnë asnjë lloj kulture, në daç të përgjithshme e në daç specifike, si fjala vjen politike. Komunikimi i tij(ose i tyre) publik, sidomos ai në një podcast të tijin, është sipërfaqësor deri në mërziti. Pos që është një lloj populisti nga ata më të rëndomtët majtistë, nuk citon kurrë ndonjë titull apo autor, qoftë sa për të thënë se ka një lloj referimi botëkuptimor mbi llojin e politikës që preferon apo modelit qeverisës që do ndiqte nëse do ishte në krye të punëve të Shqipërisë. Përkundrazi, i bën oponencën qeverisë si të qe në kafene, duke marrë nëpër gojë ministra, jo për t’u analizuar punën e faktuar dështimin, por thjesht për t’i përçmuar, rëndomësisht. Thjesht, prej pedagog Arlind Qorrit nuk mëson e nuk të mbetet asgjë, së paku krahasimisht me një oponente të fortë të qeverisjes dhe vetë kryeministrit Rama, ish-këshilltares së tij ekonomike dhe ish-zv/ministres e ish-drejtoreshës së Doganave, Irena Beqiraj. Po, është kjo që mund ta quajë Ramën injorant, gjithnjë në ekonomi, ngase e njeh mirë, edhe atë edhe ekonominë. Dhe që është po ashtu dhe e lexuar, para së cilës është Qorri ai që ngjan si injorant prej paleximit. /tesheshi.com/
