Miralem Pjaniç është aktualisht futbollisti boshnjak më popullor. Një ndër motorët e fushës për Juventusin, ai po jeton kulmet e tij futbollistike duke luajtur krah Christiano Ronaldos, e udhëhequr Zonjën e Vjetër drejt synimit për fitimin e Champions-it këtë sezon.
Por, i ardhur nga një vend ku pas ’90-ës u masakrua nga zjarri i luftës, ai nuk ka mundur që të mos e sheh veten të lidhur me atë realitet të cilin e ka përjetuar si fëmijë.
Kështu, gjatë një interviste me Bros.stories, i pyetur për preferencat e tij karshi emrave në botën e sportit, ai rendi dhe te politika duke veçuar ish-presidentin boshnjak gjatë para, gjatë dhe pas luftës, Alija Izetbegoviç.
“Alija Izetbegoviç ishte një president i madh. Vendi im i mbijetoi luftën, por, për fat të keq, ai nuk është më gjallë. Ai ishte prej atyre që më pëlqente ta dëgjoja, që mund të mësoja shumë për vendin tim dhe historinë e atdheut tim”, tha Pjaniç.
Kujtojmë se i ndjeri Alija Izetbegoviç konsiderohet lideri më i kulturuar dhe më intelektual që ka patur Ballkani. Ai jetoi luftën por nuk u akuzua kurrë për ndonjë krim. Ka lënë pas me qindra shkrime, trajtesa, analiza, si dhe libra të shkruar. /tesheshi.com/
