Albumi për të cilin po punonte prej kohësh një prej këngëtarëve më të famshëm të muzikës së lehtë në Turqi, Tarkani, ishte planifikuar të dilte në janar, por nuk ka të ngjarë të ndodhë kështu.
Admiruesit e Tarkanit do duhet të presin akoma për t’i dëgjuar interpretimet e reja nëse përpjekjet e tij për t’i shpëtuar regjistrimet do të rezultojnë të kota.
Tarkani i ka humbur të tëra regjistrimet në studio për albumin e ri pas thyerjes së hard-diskut të jashtëm, ku ato ruheshin. Ky do të ishte albumi i parë i Tarkanit në gjashtë vite.
Siç njofton e përditshmja turke Habertürk, ai është këshilluar me tre kompani të ndryshme për t’i shpëtuar regjistrimet, por përpjekjet nuk kanë dhënë rezultat. I gjendur ngushtë, Tarkani i është drejtuar policisë, e cila përdor sisteme më të sofistikuara për nxjerrjen e materialeve nga hard-disqet.
Në të kundërt, Tarkanit do i duhet të pranojë realitetin e të nisë edhe një herë regjistrimin e këngëve. /tesheshi.com/
