Ish-mesfushori brilant i Barcelonës dhe i kombëtares spanjolle vazhdon të zbresë ende në fushën e lojës, edhe pse është tanimë 38 vjeç.
Në Katar që nga viti 2015, Xavi Hernandez ka rinovuar kontratën dhe do të luajë dhe për dy sezone të tjera me Al Sadd.
Ndryshe nga shumë lojtarë të tjerë që në fund të karrierës së tyre i kanë patur të shkurtra përvojat në futbollin e Gjirit Persik, Xavi duket mjaft i kënaqur për zgjatjen e kontratës, me synimin për të patur një të ardhme në Katar dhe pas 2020-s.
Fitues i tre trofeve kupash me Al Sadd, Xavi ka deklaruar për zgjatjen e kontratës: “Jam shumë i lumtur që do të vazhdoj të jem pjesë e familjes Al Sadd për dy vitet e ardhshme. Jam i kënaqur t’i përkas këtij klubi, ku të gjithë formojmë një familje të madhe.”
Ka zëra që thonë se ai mund të bëhet trajneri i kombëtares së Katarit me përfundimin e kontratës dy vite më pas.
Barcelona humbi në fund të këtij sezoni dhe lojtarin tjetër kyç të mesfushës së saj. Ndryshe nga Xavi, Iniesta zgjodhi të vazhdojë të luajë në Japoni. /tesheshi.com/
