Mihal Kokëdhima, “njeriu i momentin” në jetën shqiptare për shkak të bujës së tij pas asaj përplasjeje të pazakontë më turistë spanjollë në Porto Palermo, duke ofruar dhe skena hollivudiane me qëndrimin mbi kofanon e makinës në ecje e thyer xhamin e saj, na paskësh qenë dhe më parë problematik, jo vetëm me turistët por dhe me ligjin.
Sipas një investigimi të Shqiptarja.com, pronari i restorantit buzë detit mes Himarës dhe Qeparoit, kushëri i Koços së njohur të “Zgjidhjes”, njëherë paskësh qenë i kapur si vjedhës energjie, në 2015-ën, e dy vjet më vonë si ndërtues pa leje.
Siç raporton Shqiptarja.com, në 2015, Mihali është përballur me drejtësinë për veprën penale të vjedhjes së energjisë dhe vetëm në prill 2016, ai është dënuar nga gjykata e Vlorës. Prokuroria fillimisht ka kërkuar tre muaj burg për Mihal Kokëdhimën ndërsa ai është dënuar me 18 muaj me kusht që të mos kryej vepër tjetër penale por të mbaj kontakte me shërbimin e provës.
Pa u mbushur një vit nga ky dënim i drejtësisë shqiptare, Mihal Kokëdhima është rikthyer sërish me shkeljen e ligjit, këtë herë me ndërtim pa leje në pronën që ai ishte administrator në resortin “Panorama”. Këtë herë prokuroria Eranda Laze ka kërkuar një vit burg, por në aplikim të nenit 59, Mihal Kokëdhimës sërish i është pezulluar burgu për t’iu kthyer në shërbim prove me kushtin që të mos kryej tjetër vepër penale.
Në shtator 2017, Kokëdhima dënohet me 16 muaj shërbim prove edhe pse më parë kishte marrë një dënim të tillë dhe konsiderohej përsëritës dhe s’mund të aplikohej neni 59, ai sërish është favorizuar nga drejtësia shqiptare – shkruan Shqiptarja.com. /tesheshi.com/
