Gjin Gjoni, një ndër emrat më të lakuar në sistemin e drejtësisë ndër vite, ka zgjedhur të vetëlargohet nga ky sistem, duke mos pranuar të kalojë në vetting. Këtë të fundit, një proces bazë i Reformës në Drejtësi, mbi të gjitha i monitoruar nga ndërkombëtarët, Gjoni e ka sulmuar ashpër. Sipas tij, vettingun e kalojnë vetëm ata që janë të lidhur me pushtetin aktual.
“Lëvizjet dhe sita e vettingut nuk ka të njëjtat parametra, dhe as kritere të barabarta për të gjithë, nëse je shërbëtor i politikës, nëse firmos dhe vulos pa menduar, nëse je shpallur më parë armik i partisë nuk shihesh me sy të mirë dhe përfundon në rrugë”, shkruan Gjon Gjoni në një letër dorëheqjeje përcjellë Këshillit të Lartë Gjyqësor.
Duke vijuar të sulmojë vettingun, ai, trupën që drejton këtë proces, e ka cilësuar të padenjë.
“Trupa që më gjykon mua dhe kolegët e mi është në nivel që lë për të dëshiruar. 80 përqind kanë qenë nëpunës të kësaj administrate“, shkruan Gjoni.
Ai përbetohet se ka ushtruar një karrierë gjyqësore të karakterizuar nga ndershmëria, e se padrejtësisht është sulmuar vitet e fundit nga pushteti.
“Përgjatë 27 viteve i kam shërbyer me devotshmëri vetëm kushtetutës dhe ligjit. Kam ditur t’i qëndroj me profesionalizëm presionit.
Për 7 vite me radhë i jam nënshtruar sulmeve politike ngapërfaqësues të pushtetit ekzekutiv. E vetmja mënyrë që ka mbetur për t’i shërbyer publikut është që të dorëhiqem duke mos lënë padrejtësinë që të marrë përpara këdo vetëm nga frika e ‘pushkatimit pa gjyq'”, arsyeton Gjin Gjoni.
Kujtojmë se si Gjoni edhe të tjerë para tij e të ngjashëm me të, kanë vendosur të dorëhiqen nga sistemi i drejtësisë para se të përballen me vettingun.
Por rasti i Gjin Gjonit është i pari në lloj ku largimi shoqërohet dhe me një sulm kaq të ashpër ndaj vettingut.
Në këtë rast, do ishte e udhës të sqarohej se si gjykohet roli i ndërkombëtarëve që minitorojnë vettingun. Ata s’ka se si të jenë të politizuar. /tesheshi.com/
