Djali i ish-biznesmenit shqiptar të Maqedonisë, rrëmbyer e zhdukur në vitet ’90, Remzi Hoxha, ka dhënë lajmin se njëri nga të akuzuarit si rrëmbyes i babait të tij, ish-shikasi Budjon Meçe, ka ndërruar jetë. Sipas tij, kjo është trishtuese, me arsyetimin se ai nuk arriti të dilte para drejtësisë. Këtij trishtimi, ai i shton dhe faktin se as qeveria “Rama” nuk mundësoi zbardhjen e rastit.
“Mandati i dytë i qeverisë Rama dhe asnjë nga këta persona që ishin marrë me çështjen e babait tim nuk e kanë ngritur zërin. Kemi bërë tentativa për të takuar edhe kryeministrin Rama, vetë e kam takuar dy herë.
Fillimisht na u tha se duhej kohë sa të forconte pozicionin e tij. Më pas, në 2015 e takova prapë dhe i ofrova edhe një zgjidhje si ta zgjidhte më lehtë duke e kapur Budjon Meçen, pasi gjendej në Shqipëri. Më orientoi te Saimir Tahiri që ishte atëkohë ministër i Brendshëm. Ai më tha t’ia çojë të gjitha infot që të merrej me rastin. Kam përgatitur edhe korrespodencën me e-mail me Tahirin.
Budjon Meçe ka qenë i implikuar. Përgjigja e Tahirit ishte se do ia kalonte policisë, por nuk është bërë asgjë. Tani kam informacion që Budjon Meçe nuk është i gjallë më. Kjo është shumë zhgënjyese, pasi kishim shpresa të mëdha se do të na ndihmonin për të gjetur eshtrat. Edhe kjo qeveri nuk ka qenë e interesuar për të zbardhur vrasjen”, tha i biri i të ndjerit Remzi Hoxha.
Pretendohet se ai u rrëmbye nga SHIK në kohën e Berishës, e gjatë një seance marrjeje në pyetje e presioni edhe fizik, humbi jetën duke bërë që trupi të zhduket. Veç Budjon Meçes, familjarë të të ndjerit akuzojnë dhe Ilir Kumbaron, që thuhet se jeton me identitet të rremë në Londër. /tesheshi.com/
