Nga Blendi Gashi
Me 1 vit burg e 2 vjet me kusht, është dënuar shoferja me inicialet Sh.D., emër i njohur për redaksinë, cila shkaktoi më 20 shtator aksidentin Te Rrethi në Prishtinë, ku mbetën të lënduar 11 persona.
Dhe ky vendim i gjykatës, ka sjellë reagimin e familjarëve të personave që kanë pësuar në këtë aksident. Njëra prej tyre është dhe Majlinda Sinani – Lulaj, qytetare nga Prishtina, dy prindërit e së cilës janë lënduar në këtë aksident, e që ka shprehur revoltën e saj.
Majlinda në një bisedë për portalin tesheshi.com ka thënë se me vendime të tilla humbet edhe ai pak besim që ka mbetur në drejtësinë kosovare. Ajo në këtë bisedë ka treguar për shëndetin e prindërve të saj, momentin e aksidentit të tyre dhe për zhgënjimin në drejtësinë e vendit në të cilin jeton.
Rrëfimi i Majlindës:
“E kam kuptuar nga mediat se vozitësja që e ka shkaktuar aksidentin te Rrethi me datë 20 shtator 2015 dhe ka lënduar 11 persona rëndë e lehtë, në mesin e tyre babën dhe nanën time, qenka dënuar me dy vite dënim me kusht dhe heqjen e patentës për 1 vit.
I rëndë ka qenë aksidenti, por them se jemi treguar të duruar e të arsyeshëm. Vendimi i Gjykatës humbet edhe atë grimë besim se ka drejtësi në këtë vend.
Arsyeja tashmë, së paku për mua, është baraz me zero. Për secilin veprim të mundshëm timin, që sot, e mbaj përgjegjëse “Drejtësinë” e këtij vendi. Nëse deri sot e kam konsideruar gjithë rastin aksident, pas këtij vendimi të gjykatës kam arsye ta konsideroj të qëllimshëm”.
Ja si u lënduan prindërit
“Prindërit e mi, babai Hetem Sinani dhe nëna Shukrije Sinani, kanë qenë me pushime në Kosovë, sepse jetojnë në Londër. Në momentin që janë aksidentuar nga vetura, kanë qenë duke pritur në trotuar, afër stacionit urban Te Rrethi’ për transport për të ardhur tek unë, në banesën time, pasi jetoj në Prishtinë.
Babai vazhdon të jetë ende në pamundësi lëvizjeje, meqë ende ndohet në fazën pas operacionit
Kanë bërë një jetë punë për këtë vend. Baba laborant mjekësor e nëna mësuese, që të dy, deri ditën kur janë deportuar dhunshëm gjatë luftës së fundit nga vendlindja.
Ka qenë Britania e Madhe ajo që u ka ofruar strehë e kujdes atëherë, por edhe tani pas aksidentit, ku vazhdojnë të jenë nën përkujdesje mjekësore”
/tesheshi.com/
