Kreu i KMSH-së Bujar Spahiu, pa veshje kleriku, ka mbajtur një lloj hytbeje(fjalimi i ditës së xhuma i hoxhës në xhami) para të sapodiplomuarve në Universitetin Beder, i hapur pak vite më parë si një universitet i llojit “islam” në Shqipëri, por që krahasimisht me universitetet klasike islame gjetkë, ose më saktë në vendet arabe ku është shkolluar elita e udhëheqësve fetarë shqiptarë nga ’90-ta e këtej, ka shumë pak ose gati aspak ngjashmëri me to.
Beder është nën administrimin e KMSH-së dhe kasta drejtuese e saj është pothuajse tërësisht nga grupimi “Gulen”, pra me arsim nga Turqia në rrjetin e shkollave të klerikut plot dritëhije, si fetare ashtu dhe politike.
Ndërsa Rektor i “Beder”-it është Gjergj Sinani, i ardhur nga fusha e mendimit ateist, i formuar në shkollën komuniste të sociologjisë dhe filozofisë.
Por cilat ishin këshillat që z. Spahiu, një i arsimuar në El-Ez’her-in e famshëm të Egjiptit?
“Sot për ju është një ditë jashtëzakonisht e veçantë. Ju do dilni në tregun e punës, do t’i vini një çmim mundit tuaj.
Shumica juaj sot, por edhe të tjerë studentë menjëherë pasi mbarojnë studimet po hedhin sytë për të ikur jashtë vendit, kjo jo për fajin tuaj.
Po unë do ju sugjeroja që të përpiqeni të kontribuoni këtu, në vendin tuaj, është sakrificë që duhet bërë edhe kjo.
Universiteti Beder dhe fryma pedagogjike këtu, ju e keni parë vetë, janë të pakrahasueshme me universitetet e tjera.
Ju do ta reflektoni këtë frymë edhe kur të dilni në treg, dhe ky reflektim do të bëjë që kjo frymë pozitive të përhapet edhe në ambiente tjera.
Përdorni dhembshurinë, kuriozitetin dhe ndjeshmërinë kundrejt të tjerëve dhe angazhimin tuaj në shërbim. Mos u dekurajoni nga asnjë vështirësi, jepni më shumë se sa merrni dhe do të shihni më pas se, keni marrë aq sa keni dhënë, e në mos më shumë.
Për të patur integritet profesional, ju duhet të keni integritet personal.
Bëhuni një pasqyrë ku të reflektohen virtytet dhe jo egoja e egërsisë së tregut.
Do të jetë e vështirë kjo, por nuk ka vend për relativizëm kur përpiqeni për vërtetësi, ndershmëri dhe besnikëri.
Unë e lus Zotin t’ju japë juve sukses në çdo drejtim që do të merrni.
E lus Zotin gjithashtu që suksesi juaj të jetë shpërblim i mundit dhe i sakrificës së prindërve tuaj dhe ata t’ia ndiejnë shijen e shpërblimit të mundit që në këtë botë.
Paçi suksese e begati kudo që të jeni!”, tha ndër të tjera njeriu që menaxhon institucionalisht jetën institucionale të muslimanëve shqiptarë. /tesheshi.com/’
