Ajo çfarë ka ndodhur në Kumanovë është përgjegjësi ekskluzive e qeverisë së Maqedonisë, tha sot ministri i Punëve të Brendshme, Skender Hyseni. Ai dhe drejtori i Përgjithshëm i Policisë së Kosovës, Shpend Maxhuni, kanë raportuar sot lidhur me ngjarjet në Kumanovë të Maqedonisë, në mbledhjen e Komisionit për Punë të Brendshme, Siguri dhe Mbikëqyrjen e Forcës së Sigurisë së Kosovës, kryesuar nga kryetari i komisionit Daut Haradinaj.
Ministri Hyseni duke u përgjigjur në pyetjet e anëtarëve të Komisionit, ka mohuar të ketë pasur informata nga Agjensia Kosovare e Intelegjencës lidhur me situatën në Maqedoni. “Ministria e Punëve të Brendshme dhe Policia e Kosovës nuk kanë pranuar asnjë raport të AKI-së lidhur me situatën në Kumanovë. Ne nuk kemi qenë të njoftuar me kohë për këto veprime në territorin e Maqedonisë”, tha ministri Hyseni.
Më tej, Hyseni ka sqaruar se që nga 21 prilli kur ka ndodhur incidenti i Gushicës, MPB-ja ka ndërmarrë të gjitha veprimet e lejuara me ligj në territorin e Republikës së Kosovës, që të sigurojë kufirin dhe të ndërmarrë veprime operative gjatë vijës kufitare në atë zonë, në mënyrë që të mos ketë veprime kriminale në territorin e Kosovës. Ndërsa, shtoi se “ajo çfarë ka ndodhur në Kumanovë është përgjegjësi ekskluzive e Qeverisë së Republikës së Maqedonisë”.
Ministri Hyseni tha se duhet të bëhet një hetim ndërkombëtar për konflitin që ka ndodhur në Kumanovë, ndërsa ka theksuar se MPB-ja në vazhdimësi ka bërë përpjekje të parreshtura për informata të sakta nga autoritetet maqedonase dhe do të vazhdojë ta bëjë atë që është në juridiksionin e MPB-së.
Sa i përket shqetësimeve që u ngritën nga anëtarë të Komisionit edhe lidhur me bastisjet e shtëpive të pjesëtarëve kosovarë të arrestuar në Maqedoni, drejtori i Përgjthshëm i Policisë së Kosovës, Shpend Maxhuni, tha se bastisjet kanë ndodhur me urdhër të Prokuorit.
“Sa i përket njoftimit të familjeve, ne nuk mund të konfirmojmë vdekjen e dikujt derisa nuk kemi një çertifikatë mbi vdekjen e shtetasve të Kosovës”, tha Maxhuni, ndërsa sqaroi se rezultohet të jenë 9 kosovarë të vrarë dhe 21 të arrestuar.
Duke u përgjegjur në pyetjet edhe lidhur me takimet e përbashkëta mes presidentes, kryeminstrit, ministrit të Jashtëm dhe dhe ministrit të Brendshëm, Hyseni sqaroi se ka pasur takime të rregullta për të analizuar situatën për veprimet e Policisë drejt parandalimit të eskalimit të situatës në territorin e Kosovës.
