Qëndrimi i Hungarisë ndaj emigrantëve nuk ka ndryshuar aspak. Ashtu si në të shkuarën e afërt, për qeverinë hungareze është e padëshiruar mbërritja e emigrantëve në vend, posaçërisht e atyre të ardhur nga vendet në konflikt të Lindjes së Mesme apo Afrikës.
Një ministër i qeverisë hungareze, Janos Lazar, paralajmëroi në një konferencë shtypi në Budapest se nuk do të pranohet asnjë emigrant të dërguar nga vendet e Bashkimit Europian.
“Vendet perëndimore europiane, në veçanti Gjermania dhe Suedia, duan të kthejnë në Hungari rreth 30.000 emigrantë. Ne nuk do t’i pranojmë ata,” u tha ai gazetarëve.
“Emigrantët nuk hynë në zonën e BE-së nga Hungaria, hynë nga Greqia. Hungaria nuk do të ndërmarrë asnjë hap për t’i kthyer ata.”
Hungaria do të ngrinte gardhe me tela me gjemba dy vite më parë në kufirin me Serbinë dhe Kroacinë për t’u prerë rrugën refugjatëve që synonin të shkonin drejt vendeve më të zhvilluara europiane. Veç masave ligjore plotësuese, tani ka nisur dhe vendosja e një gardhi të dytë pengues në kufi.
Kalimi nëpër Maqedoni, Serbi, Hungari dhe Austri ishte në 2015-n udha e përdorur nga refugjatët në rrugëtimin e tyre drejt Europës. /tesheshi.com/
