Hungaria do të tërheqë ambasadorin e saj në Hagë për një periudhë të pacaktuar kohe, pasi diplomati holandez në Budapest kritikoi ashpër qeverinë e kryeministrit, Viktor Orbán, njoftoi media lokale.
Péter Szijjártó, ministër i Jashtëm, tha se Hungaria do të marrë “hapa politikë dhe diplomatikë” në qoftë se Holanda nuk kërkon zyrtarisht falje për akuzat e Gajus Scheltema, ambasadorit holandez, mandati i të cilit përfundon brenda pak ditësh.
Scheltema tha në një intervistë për revistën “168 Ora” se retorika e administratës së Orbanit është e ngjashme me atë të përdorur nga terroristët në Lindjen e Mesme.
Scheltema tha se terroristët pas sulmit të javës së kaluar në Barcelonë ishin “humbës të globalizimit”. Ai shtoi se ata “krijojnë armiq me të njëjtin parim si qeveria hungareze”.
Por ministri i Jashtëm hungarez e cilësoi të turpshme deklaratën, ndërsa theksoi se askush më parë nuk ka artikuluar një akuzë të tillë. /tesheshi.com/
