Hungaria duket se është përfshirë nga paranoja ndaj refugjatëve. Qeveria e kryeministrit Viktor Orban njoftoi se po ndërton gardh me me tela me gjemba edhe përgjatë kufirit me Kroacinë, ndërsa më herët gardhi 150 kilometra i gjatë ka përfunduar në kufirin me Serbinë.
Zgjidhja e shpejtë, si e cilësoi Orban, gardhin me Kroacinë për të frenuar fluksin e refugjatëve që hyjnë në vend, do të përfundojë shumë shpejt në pjesën më të rrahur nga refugjatët prej 41 kilometrash, aty ku vendet nuk ndahen nga ujërat e lumit.
Orban nuk bëri të ditur nëse gardhi do të ngrihet përgjatë 329 kilometrave të kufirit mes Hungarisë dhe Kroacisë, por tha se edhe për barrierën e re do të aplikohen të njëjtat rregulla si me gardhin në kufi me Serbinë. Hungaria e ka shndërruar në vepër penale kalimin illegal të kufirit dhe dëmtimin e gardhit me tela me gjemba.
Më herët, agjencitë raportuan edhe për plane të Hungarisë për gardh me Rumaninë, por kjo nuk është konfirmuar ende.
Pavarësisht rrethimit që u ka bërë kufijve të vet, duke u barrikaduar përballë refugjatëve, Hungaria, sipas Orban, do të zbatojë konventën e Gjenevës dhe traktatet e tjera ndërkombëtare për trajtimin e refugjatëve.
Masat drakoniane në kufijtë hungarezë kanë bërë që vendi të vendoset në qendër të vëmendjes disa herë për shkak të dhunës së përdorur nga policia ndaj refugjatëve që kërkuan të shpërthejnë pengesat për të vijuar rrugën e tyre. /tesheshi.com/
