Austria u ka kërkuar ekspertëve ligjorë të BE-së të rishqyrtojnë vendimin e Parlamentit Europian për të filluar sanksione kundër Hungarisë, njoftoi ministria e jashtme austriake.
Kjo u bë e ditur nga zv.kryeministri austriak Heinz-Christian Strache, Partia Liberale e të cilit është një parti e afërt me Fides-in e kryeministrit Viktor Orban.
Të mërkurën, ligjvënësit evropianë votuan për të filluar procesin e sanksionimit të Hungarisë sepse, siç thanë ata, ka “shkelje serioze” të rregullave themelore evropiane dhe epilogu mund të ishte konfiskimi i të drejtave të votimit të Budapestit brenda BE.
Ministri i Jashtëm hungarez, Peter Szijjarto njoftoi se Budapesti do të kërkonte mjete ligjore për të sfiduar vendimin, sepse votat e abstenuar nuk u morën parasysh, gjë që ndryshoi rezultatin e votimit.
Partia Kurz gjithashtu votoi kundër Hungarisë
“Kam simpati të madhe për argumentin e Hungarisë”, tha Strache.
Partia e Strache kritikoi votimin në PE, por Partia Popullore e Kancelarit Sebastian Kurz votoi kundër Hungarisë.
Kurz tha se ende nuk ishte një gjykim i Hungarisë, por vetëm “akuza dhe pretendime” që tani duhet të hetohen.
Çështja nuk do të diskutohet në një takim jozyrtar të udhëheqësve të BE, mikpritësi i të cilit është Kurz, i cili do të mbahet të mërkurën dhe të enjten në Salzburg, shkruan Kleine Zeitung duke përcjellë një deklaratë nga Kurz. /tesheshi.com/
