Kryeministri i Hungarisë do të kërkojë nga Bashkimi Evropian që të financojë gjysmën e kostos së masave të mbrojtjes kufitare të vendit të tij, për të mos lejuar hyrjen e migrantëve, ka thënë një ndihmës i Viktor Orban.
Shefi i stafit të kryeministrit hungarez, Janos Lazar ka thënë se Orban do t’i shkruajë presidentit të Komisionit Evropian, Jean-Claude Juncker, për të kërkuar që të kontribuojë me rreth 400 milionë euro, raporton Reuters.
Ai ka thënë se Hungaria, duke forcuar kufirin me Serbinë dhe Kroacinë, përmes ndërtimit të gardhit, vendosjes së policisë dhe ushtrisë “ka mbrojtur të gjithë banorët e Evropës nga vala e migrantëve ilegalë”.
Sipas tij, është koha që BE-ja ta ndihmojë Hungarinë, ashtu siç ka ndihmuar Italinë, Greqinë dhe Bullgarinë.
“Standardet e dyfishta nuk duhet të aplikohen”, ka thënë Lazar në një konferencë për media.
Më 2015, qindra mijëra migrantë, që po iknin nga lufta dhe varfëria, kanë kaluar nëpër Hungari, për të vazhduar në vendet e Evropës Perëndimore.
Hungari ka ndërtuar një gardh përgjatë kufirit, për të parandaluar hyrjen e migrantëve ilegalë. /tesheshi.com/
