Budapesti u ka tërhequr vëmendjen ambasadorëve nga pesë vende nordike, duke i akuzuar ata për informacion të rremë për Hungarinë, pasi ato vende shprehën shqetësimin për demokracinë për shkak të fuqive të shtuara të qeverisë së Viktor Orban gjatë pandemisë së virusit korona.
Në një deklaratë, Ministri i Jashtëm hungarez Peter Szijarto sulmoi qeveritë e Islandës, Suedisë, Danimarkës, Norvegjisë dhe Finlandës, duke i akuzuar ata për “përhapjen e informacionit të rremë”.
Më 30 mars, Parlamenti hungarez miratoi një ligj të diskutueshëm që lejon kryeministrin Orban të qeverisë vendin me dekrete gjatë gjendjes së jashtëzakonshme të vendosura për shkak të pandemisë së virusit koronar.
Pas kritikave të shumta nga bashkësia ndërkombëtare e ligjit, Sekretarja e Përgjithshme e Këshillit të Evropës, Marija Pejçinoviç Buriç theksoi se gjendja e jashtëzakonshme “në mënyrë të pacaktuar dhe pa asnjë kontroll nuk garanton se do të respektohen parimet themelore të demokracisë dhe se kufizimi i të drejtave themelore të njeriut do të jetë proporcionale me kërcënimin që duhet luftuar”.
Ministrat e jashtëm të pesë vendeve nordike shprehën shqetësimin më 6 maj, duke deklaruar se “sundimi i ligjit duhet të mbizotërojë edhe në një situatë emergjente”.
Ministri Szijjarto u përgjigj duke pyetur nëse “ministrat e Danimarkës, Finlandës, Islandës, Norvegjisë dhe Suedisë e dinë më mirë sesa hungarezët se çfarë duan hungarezët?”
“Lërini ata të kujdesen për punët e tyre,” u tha kreu i diplomacisë hungareze kolegëve të tij nga vendet nordike.
Që nga kthimi në pushtet në 2010, Orban është kritikuar rregullisht nga organizatat ndërkombëtare për sundimin e tij autoritar mbi Hungarinë.
Javën e kaluar, OJQ-ja Freedom House e largoi Hungarinë nga lista e vendeve demokratike dhe e klasifikoi atë si “regjim hibrid”.
Hungaria është anëtare e Këshillit të Evropës, një organizatë që bashkon 47 vende.
Budapesti ka hedhur poshtë kritikat për vendosjen e një gjendjeje të jashtëzakonshme.
Qeveria thekson se Parlamenti mund të pezullojë masat emergjente në çdo kohë, dhe se gjendja e jashtëzakonshme do të hiqet pas përfundimit të pandemisë.
Ndërkohë, Parlamenti Evropian do të diskutojë të mërkurën situatën e të drejtave të njeriut në Hungari. /tesheshi.com/
